اقش-تىڭ حيۋستون قالاسىندا ۇستەل تەننيسىنەن الەم چەمپيوناتىنىڭ شىمىلدىعى ءتۇرىلدى. بۇل جارىستا ەرلەر مەن ايەلدەردى قوسا العاندا, بارلىعى 238 سپورتشى باق سىنايدى.
بەس جۇلدە جيىنتىعى ساراپقا سالىنىپ جاتقان ءدۇبىرلى دودادا قازاقستاننىڭ نامىسىن ەكى ويىنشى قورعاۋدا. زاۋرەش اقاشەۆا (الەمدىك رەيتينگتە 170-ورىندا تۇر) تۇساۋكەسەر كەزدەسۋىندە پانامەريكا ويىندارىنىڭ جەڭىمپازى, پۋەرتو-ريكونىڭ وكىلى دانيەليا ريوستى (184) 4:1 ەسەبىمەن جەڭدى. ەندى 1/32 فينالدا ول جۇپتىق سايىستاعى توكيو وليمپياداسىنىڭ چەمپيونى, جاپونيالىق ميما يتومەن (3) شەبەرلىك بايقاسادى. ال اناستاسيا لاۆروۆا (167) اسا شيەلەنىستى باسەكەدە جاسوسپىرىمدەر وليمپياداسى مەن جاستار اراسىنداعى الەم چەمپيوناتىنىڭ جۇلدەگەرى, رۋمىنيالىق اندرەيا دراگومانعا (252) جول بەردى. ەسەپ – 3:4.