كەشە باس پروكۋرور اسحات داۋىلباەۆ جانە حالىقارالىق كوشى-قون ۇيىمىنىڭ قازاقستانداعى ميسسياسىنىڭ باسشىسى دەيان كەسەروۆيچ ادام ساۋداسىنا قارسى ارەكەت ەتۋ سالاسىنداعى ىنتىماقتاستىق ماسەلەلەرى بويىنشا ءوزارا تۇسىنىستىك تۋرالى مەموراندۋم جاساستى.
قازاقستان ۇزاق جىلدار بويى حالىقارالىق كوشى-قون ۇيىمىمەن كوشى-قون, ەتنيكالىق قازاقتاردى تاريحي وتانىنا قايتارۋ, مۇقتاج ادامدارعا كومەك كورسەتۋ ماسەلەلەرى بويىنشا جۇمىس اتقارىپ كەلەدى. ءبىزدىڭ ەلىمىز 2002 جىلى حالىقارالىق كوشى-قون ۇيىمىنىڭ تولىق قۇقىقتى مۇشەسى اتاندى.
قۇجاتقا قول قويۋدىڭ وزەكتىلىگى تۋرالى ايتا كەلە, ا.داۋىلباەۆ قۇقىق قورعاۋ ورگاندارىنىڭ ادام ساۋداسىمەن كۇرەس سالاسىندا قىزمەت اتقاراتىن ۇكىمەتتىك ەمەس جانە قوعامدىق ۇيىمدارمەن ىقپالداستىعىنىڭ بەلسەندىلىگىن ارتتىرۋدىڭ ماڭىزدىلىعىن اتاپ ءوتتى. بۇل رەتتە باس پروكۋراتۋرانىڭ حالىقارالىق كوشى-قون ۇيىمىمەن ىنتىماقتاستىعىن تەرەڭدەتۋ ازاماتتاردىڭ قۇقىقتارى مەن بوستاندىقتارىنىڭ كەپىلدىگىن نىعايتۋعا باعىتتالعان ارىپتەستىكتىڭ جالعاسى بولىپ تابىلادى. قول جەتكىزىلگەن ۋاعدالاستىقتارعا سايكەس, ادام ساۋداسىنىڭ قۇرباندارىنا جاردەم بەرۋ, ادام ساۋداسىنا قاتىستى ارەكەتتەردىڭ الدىن الۋ جانە تەرگەۋ ماسەلەلەرى بويىنشا اقپارات الماسۋ, سونداي-اق بىرلەسكەن پروفيلاكتيكالىق ءىس-شارالار ۇيىمداستىرۋ ءوزارا ءىس-ارەكەتتىڭ نەگىزگى باعىتتارى رەتىندە بەلگىلەندى. سونىمەن قاتار, تاراپتار قازاقستان رەسپۋبليكاسى ۇكىمەتىنىڭ ادام ساۋداسىنا بايلانىستى قىلمىستاردى بولدىرماۋ جوسپارىن جۇزەگە اسىرۋ اياسىندا كۇش-جىگەرلەرىن شوعىرلاندىرۋدى كوزدەپ وتىر. ورتالىق ازياداعى كوشى-قوندى رەتتەۋ, ەڭبەك ميگرانتتارىنىڭ قۇقىقتارىن قورعاۋ, ادام ساۋداسىنا قارسى كۇرەس, قازاقستاننىڭ بارلىق ايماقتارىندا ارەكەت ەتەتىن ادام ساۋداسى قۇرباندارىن ساۋىقتىرۋ ءۇشىن داعدارىستىق ورتالىقتاردىڭ جۇمىسىن قولداۋ – اتالعان جۇمىستىڭ نەگىزگى باعىتتارى بولىپ تابىلادى, دەپ حابارلادى باس پروكۋراتۋرانىڭ ءباسپاسوز قىزمەتى.