كەشە پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ سەلەكتورلىق رەجىمدە كەڭەس وتكىزىپ, وندا «حالىقتى تۇرعىن ۇيمەن قامتاماسىز ەتۋدىڭ جايى مەن پەرسپەكتيۆالارى تۋرالى» 2012 جىلعى 7 جەلتوقسانداعى پارلامەنتتىك تىڭداۋلار قورىتىندىسى بويىنشا بەرگەن پارلامەنت ءماجىلىسىنىڭ ۇسىنىسىن ورىنداۋ جونىندەگى ماسەلەلەر قارالدى, دەپ حابارلادى پرەمەر-ءمينيستردىڭ ءباسپاسوز قىزمەتى.
كەڭەس جۇمىسىنا پرالامەنت ءماجىلىسىنىڭ دەپۋتاتتارى, ورتالىق اتقارۋشى ورگانداردىڭ باسشىلارى, وبلىستار, استانا مەن الماتى قالالارىنىڭ اكىمدەرى قاتىستى.
«تۇتاستاي العاندا, تۇرعىن ءۇي قۇرىلىسى ماسەلەلەرى بويىنشا ساياسات حالىق ءۇشىن تۇرعىن ءۇي قولجەتىمدىلىگىن ودان ءارى ارتتىرۋعا باعىتتالاتىن بولادى», دەدى ب.ساعىنتاەۆ.
پارلامەنت ءماجىلىسىنىڭ ۇسىنىسىن ورىنداۋ بويىنشا قابىلدانعان شارالار تۋرالى وڭىرلىك دامۋ ۆيتسە-ءمينيسترى س.نوكين سويلەدى. ول «قولجەتىمدى تۇرعىن ءۇي-2020» باعدارلاماسى شەڭبەرىندە تابىسى تومەن ازاماتتاردى تۇرعىن ۇيمەن قامتاماسىز ەتۋ ماقساتىندا, ەكونوم-ساناتتى شاعىن ۇيلەر سالۋ مەن پايدالانۋ تۋرالى شەشىم قابىلدانعانىن, سونداي-اق قارجىلىق قۇرال سيپاتىندا حالىققا تۇرعىن ءۇي جيناق جۇيەسى نەمەسە ودان ءارى ساتىپ الۋ قۇقىعى بار ۇزاق مەرزىمدى جالعا الۋ ارقىلى ءمۇمكىندىك بەرىلەتىنىن ايتتى.
كەڭەس بارىسىندا پارلامەنت ءماجىلىسىنىڭ دەپۋتاتى د.نازارباەۆا بۇگىنگى كۇنگە ۇسىنىستىڭ 70 پايىزىنىڭ ورىندالعانىن, قالعان ماسەلەلەر بويىنشا ۇكىمەتتىڭ ءتيىستى جۇمىستاردى جۇرگىزىپ جاتقانىن اتاپ ءوتتى. سونىمەن بىرگە, د.نازارباەۆا ينۆەستورلاردى الەۋمەتتىك ۇيلەر سالۋعا, سونداي-اق ۇلگىلىك الەۋمەتتىك نىساندار جوبالارىن دايىنداۋعا ىنتالاندىرۋ قاجەتتىگىنە نازار اۋدارتتى.
كەڭەستى قورىتىندىلاي كەلە, پرەمەر-ءمينيستردىڭ ءبىرىنشى ورىنباسارى مۇددەلى مەملەكەتتىك ورگاندارعا جانە وبلىستار, استانا مەن الماتى قالالارىنىڭ اكىمدەرىنە «قولجەتىمدى تۇرعىن ءۇي-2020» باعدارلاماسىن ءتيىمدى جۇزەگە اسىرۋدى قامتاماسىز ەتۋدى تاپسىردى.
سونداي-اق, ب.ساعىنتاەۆ «حالىق ءۇشىن اسا ماڭىزدى وسىناۋ ماسەلەنى بىرلەسىپ تالقىلاۋ ءتيىمدى شەشىمدەر قابىلداۋ ءۇشىن وتە پايدالى, دەي كەلە, پارلامەنتتىك تىڭداۋلار قورىتىندىلارى جانە باسقا دا ماڭىزدى ماسەلەلەر بويىنشا ۇسىنىستاردىڭ ورىندالۋى بارىسىن ءبىرلەسىپ تالقىلاۋ ءۇردىسىن ودان ءارى جالعاستىرۋ ءتيىمدى», دەپ اتاپ كورسەتتى.