قازاقستاندىق قىزدار ەلورداداعى «داۋلەت» تەننيس ورتالىعىندا 12 جاسقا دەيىنگىلەر اراسىندا ءوتىپ جاتقان ازيا كوماندالىق بىرىنشىلىگىنىڭ (ITF Asian 12&Under Team Championships 2021) جارتىلاي فينالىنا شىقتى, دەپ حابارلايدى Egemen.kz.
قازاقستان تەننيس فەدەراتسياسى ءمالىم ەتكەنىندەي, قىزدار 2019 جىلعى چەمپيوندىق اتاعىن ءساتتى قورعاۋدا. جارىستىڭ ەكىنشى كۇنى قازاقستاندىق قىزدار مالايزيا قۇراماسىن 3:0 ەسەبىمەن ۇتتى.
سابينا شۋحراتوۆا اداني راينانعا بىردە-ءبىر گەيم بەرگەن جوق. ەۆا كورىشەۆا دا داني دانيەلانى وڭاي ۇتتى – 6:2, 6:3. ە.كورىشەۆا مەن ەۆەلينا بالاگانسكايا جۇپتىق سىندا ابد حازلي – ۋميراحتان باسىم ءتۇستى – 6:2, 6:1. توپتىق سىنداعى سوڭعى ماتچىن قازاقستاندىقتار ۇندىستانمەن وتكىزەدى. جەڭىلىسسىز كەلە جاتقان قوس كوماندا دا جارتىلاي فينالعا جولداما الدى. ەندى قاي جەڭگەنى جارتىلاي فينالعا ءبىرىنشى ورىنمەن شىعادى.
الايدا, قازاقستاندىق ۇلدار تايلاند قۇراماسىنان جەڭىلىپ قالدى – 1:2. اۋەلى ماديار تاعىبەكوۆ سۋراتيتوتين كان تحاتقا ەسە جىبەردى – 3:6, 2:6. ياروسلاۆ پشەنيچنىي جەكەلەي سىندا تارازى باسىن تەڭەستىردى. ايتسە دە جۇپتىق سىندا يا.پشەنيچنىي مەن م.تاعىبەكوۆ كان تحاتۋ مەەن پنگايادان ايلاسىن اسىرا المادى – 5:7, 2:6.
ەندى قازاقستاندىق ۇلدارعا قالايدا جارتىلاي فينالعا شىعۋ ءۇشىن يوردانيا قۇراماسىن ۇتۋى كەرەك.