كەشە پرەمەر-مينيستر سەرىك احمەتوۆ سىرتقى ىستەر مينيسترلىگىندە قازاقستاننىڭ شەتەلدەردەگى ديپلوماتيالىق وكىلدىكتەرىنىڭ باسشىلارىمەن شەتەل ينۆەستورلارىن تارتۋ ماسەلەسى جونىندە بەينە كونفەرەنتسيا تۇرىندەگى كەڭەس وتكىزدى, دەپ حابارلايدى پرەمەر-ءمينيستردىڭ ءباسپاسوز قىزمەتى.
ۇستىمىزدەگى جىلعى 14 اقپاندا وتكەن ۇكىمەتتىڭ كەڭەيتىلگەن ماجىلىسىندە مەملەكەت باسشىسى ناق وسىنداي تاپسىرما بەرگەن بولاتىن. كەڭەس جۇمىسىن اشىپ, سەرىك احمەتوۆ ءسوز سويلەدى. «قازىرگى كەزدە ينۆەستيتسيا تارتۋ جونىندەگى كەشەندى جوسپار بەلگىلەۋ جانە ينۆەستورلار ءۇشىن جاڭا ىنتالاندىرۋ شارالارىن جاساۋ ءۇشىن ارنايى كوميسسيا قۇرىلۋدا» دەدى ول ءوز سوزىندە. «وسى باعىتتا قازاقستاندىق ەلشىلىكتەرگە بەلسەندى جۇمىس جۇرگىزۋگە تۋرا كەلەدى جانە ءبىز سىزدەردەن ناقتى ناتيجەلەر كۇتەمىز» دەدى ديپلوماتتارعا ارناعان سوزىندە پرەمەر-مينيستر.
ودان ءارى ۇكىمەت باسشىسى قازاقستان ينۆەستيتسيا ءۇشىن ارقاشان اشىق ەكەندىگىن اتاپ كورسەتتى. «ءبىز ينۆەستورلار ءۇشىن بارلىق قولايلى جاعدايدى جاسايمىز. ەل پرەزيدەنتىنىڭ ناقتى تاپسىرماسى بار: ينۆەستورلار ءۇشىن اشىق ەرەجەلەر جاساۋ كەرەك. كەدەن وداعى جانە بىرىڭعاي ەكونوميكالىق كەڭىستىكتە ءبىزدىڭ ەلدىڭ سالىق تولەۋ ءتارتىبى ەڭ ءتيىمدى ەكەندىگىن ەسكەرتىپ, قازاقستان ينۆەستورلار ءۇشىن پايدالى الاڭ ەكەندىگىن اتاپ كورسەتەمىن» دەدى س.احمەتوۆ.
كەڭەستە پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ, بىرقاتار ديپلوماتيالىق وكىلدىكتەردىڭ باسشىلارى ءسوز سويلەدى.
كەڭەس قورىتىندىسىندا س.احمەتوۆ سىرتقى ىستەر مينيسترلىگىنە, ديپلوماتيالىق وكىلدىكتەردىڭ باسشىلارىنا ءىرى كومپانيالاردىڭ, ترانسۇلتتىق كورپوراتسيالاردىڭ باسشىلارىمەن كەزدەسۋلەر وتكىزۋدى تاپسىردى. «ءبىز قانداي سالالاردا ارىپتەستىك جاسايتىنىمىزدى ناقتى ءبىلۋىمىز كەرەك. ۇستىمىزدەگى جىلدىڭ 10 ناۋرىزىنا دەيىن قازاقستاندا جۇمىس ىستەۋگە نيەت بىلدىرگەن الەۋەتتى ينۆەستورلاردىڭ ءتىزىمى جاسالۋى كەرەك» دەدى پرەمەر-مينيستر. بۇعان قوسا, ۇكىمەت باسشىسى شەتەل ينۆەستورلارىنىڭ قازاقستاندىق سەرىكتەستەرىمەن كەزدەسۋىن ۇيىمداستىرۋ جونىندە تاپسىرما بەردى. «بۇل جۇمىسقا بارلىق سالالىق مەملەكەتتىك ورگاندار, حولدينگتەر, ۇلتتىق كومپانيالار جانە جزق قاتىسۋى كەرەك. وسى كەزدەسۋلەردىڭ ناتيجەسىندە ناقتى كەلىسىمدەر جاسالۋى قاجەت», دەپ اتاپ كورسەتتى ۇكىمەت باسشىسى. سونىمەن بىرگە, پرەمەر-مينيستر وكىلەتتى مەملەكەتتىك ورگاندارعا, ۇلتتىق كومپانيالارعا «قازاقستاندىق ونىمدەردى ەكسپورتقا شىعارۋدى ىنتالاندىرۋ ماقساتىنداعى ناقتى ساۋدا ميسسيالارىن ۇيىمداستىرۋ جوسپارىن بەلگىلەۋ» ماسەلەسىن تاپسىردى.