اسپاندا قانشا جۇلدىز بار؟ ايدىڭ ءتۇسى قانداي؟ كۇن نەگە جەردى اينالادى؟ ال جەر نەگە دومالاق؟ جارىقتىڭ جىلدامدىعىنا ولشەم بار ما؟ ءبىز نە ءۇشىن ءتۇندى قارامەن, كۇندى سارىمەن بويايمىز؟ بىلەسىز بە, بۇل سۇراقتار يلليۋزياعا تولى بولعانىمەن, ءبارىنىڭ دە جاۋابى بار. ال ونى بىزگە استرونومدار ايتادى.
جوعارىداعى ساۋالداردى تۇرمىستىق كەسكىندەمە جانە جانرلىق پورترەت شەبەرى, گوللاند سۋرەتشىسى يان ۆەرمەەردىڭ «استرونوم» كارتيناسىنا قاراپ قۇرادىق. كوركەمونەردىڭ التىن عاسىرىندا, جو-جوق ەركىندىك پەن گۇلدەنۋ داۋىرىندە دۇنيەگە كەلگەن تالانت يەسى بەينەلەۋ ونەرى تاريحىندا ورنى ەرەك تۇلعا. ول تەك قىلقالام شەبەرى ەمەس, ءتاپ-ءتاۋىر كاسىپكەر دە بولعان ادام. ونىڭ عالىم ەنتوني ۆان لەۆەنگۋكپەن قارىم-قاتىناستا بەكەر بولماعانى كوپكە ءمالىم.
ونىڭ مانسابى تۋرالى ناقتى ماعلۇمات جوق, ءومىربايانىنا ۇڭىلسەڭىز تەك ونەرمەن قورشالعان. وعان كوبىنە يتاليالىق كەسكىندەمەلەر مەن كاراۆادجو شىعارماشىلىعى ەرەكشە اسەر ەتكەنى ايتىلادى. كارتيناداعى قانىق تۇستەر مەن بوياۋلاردىڭ تىعىز قاباتى يتاليالىق كوڭىل كۇيدى بەرەدى. جانرلىق سيۋجەتتەر جۇمىسىنىڭ جەتەكشى لەيتموتيۆى مەن ەرەكشەلىگىنە اينالعانى داۋسىز.
سۋرەتشى ءوزىنىڭ كەزەكتى جۇمىسى ءۇشىن 45ح41 سانتيمەتر ولشەمدى كەنەپ ءپىشىمىن تاڭداعان. بايقايسىز با, كەسكىندەمەشىنىڭ وزىنە ءتان قولتاڭباسى ونىڭ جارىقتى ادەمى ۇيلەستىرۋىنەن-اق بىلىنەدى. ال مىنەزى قاراپايىم بەينەنى مونۋمەنتالدى بەينەگە اينالدىرۋىندا, سونىمەن قاتار كۇندەلىكتى ءومىردىڭ ۇساق-تۇيەگىنە ءمان بەرۋىندە تۇر.
شىعارماداعى گلوبۋس سياقتى گەوگرافيالىق كارتادا نيدەرلاندتىڭ جەر كولەمى بەينەلەنگەن. سول ارقىلى سۋرەتشى ۇلتىن ماقتان تۇتادى. ويتكەنى قىزعالداقتىڭ وتانى سانالاتىن ەجەلگى مەملەكەت XVII عاسىردا حالىقارالىق ساۋدانىڭ ناتيجەسىندە باي ەلدەردىڭ بىرىنە اينالدى.
كارتينانىڭ اتاۋى – اقىل مەن عىلىمنان حابار بەرىپ تۇرسا, ونداعى كەيىپكەر عالامشاردىڭ يەسى ەسەبىندە جەردى اينالدىرادى. نازىك جارىقتاندىرىلعان كورىنىس ادامزات پەن عالامشاردىڭ قارىم-قاتىناسىن ءدال بەينەلەيدى جانە بۇل قارىم-قاتىناستا ءبىلىم ماڭىزدى ەكەنىن ايشىقتايدى. ول كەستەدەگى ماتىندەردەن دە كورىنىس تابادى. كارتيناداعى ادام – ەنتوني ۆان لەۆەنگۋك. ول – ميكروسكوپتى قۇراستىرۋشى.
ايتپاقشى, سۋرەتشى مەن عالىم ءبىرىن-ءبىرى جاقسى بىلگەن. ءتىپتى بىرلەسىپ تالاي شارۋانى تياناقتاعان ەكەن. بۇل تۋىندىنى ايگىلى سۋرەتشى دوسىنا ارناعانى انىق. دوسى ارقىلى بۇكىل ۇلتتىڭ عىلىمىنا شولۋ جاسايدى. كارتينانىڭ قۇپياسى دا سوندا جاتقانداي...