توبىل وڭىرىندە سوڭعى ون شاقتى جىلدىڭ ىشىندە ەرەكشە قاجەتتىلىككە يە جاندارعا ارنالعان سپورت جارىستارى مەن تۋرنيرلەر ءجيى ءوتىپ ءجۇر. وبلىستا مۇمكىندىگى شەكتەۋلىلەر سپورتى دا جىل ساناپ دامىپ كەلەدى. اتالعان سالادا ءتۇرلى ماسەلەلەر دە بوي كورسەتىپ قالادى, بىراق بىرتىندەپ شەشىمىن تاۋىپ جاتىر.
ء«ۇمىت-نادەجدا» قوعامدىق قورىنىڭ توراعاسى دۇيسەنعالي وسپانوۆتىڭ باستاماسىمەن 2015 جىلى وبلىستىق «مۇگەدەكتەر سپورت كلۋبى» قۇرىلعان. اتالعان مەكەمە سودان بەرى ىنتالى مۇمكىندىگى شەكتەۋلى جانداردىڭ وزدەرى قالاعان سپورت تۇرلەرىمەن شۇعىلدانۋىنا جاعداي تۋعىزىپ, ورىنجاي جانە سپورت قۇرىلعىلارىمەن قامتاماسىز ەتۋ, ءتۇرلى دەڭگەيدەگى جارىستارعا اپارۋ, ءىسساپار قاراجاتىن تابۋ سياقتى ماسەلەلەردى رەتتەۋمەن اينالىسىپ كەلەدى.
بۇگىندە كلۋبقا مۇشە 214 سپورتشىنىڭ 167-ءى – قوستاناي قالاسىندا, رۋدنىيدا – 18, ليساكوۆ قالاسىندا – 24, ارقالىقتا 5 ادام جازعى جانە قىسقى سپورت تۇرلەرىمەن كاسىبي تۇردە اينالىسادى. د.وسپانوۆتىڭ ايتۋىنشا, وبلىستاعى ەرەكشە قاجەتتىلىگى بار جاندار ۇزىن سانى 17 سپورت تۇرىمەن شۇعىلدانادى. ونىڭ ىشىندە ءجۇزۋ, ۇستەل تەننيسى, ۆولەيبول, شاڭعىمەن سىرعاناۋ, پاۋەرليفتينگ, جەڭىل اتلەتيكا, تاەكۆوندو, دزيۋدو سەكىلدى ون شاقتى پاراليمپيادالىق سپورت تۇرلەرى بار. بۇعان اربا ءبيى ۇيىرمەسى مەن ەركىن كۇرەس, ميني-فۋتبول, شاحمات سىندى سۋردليمپيالىق سپورت تۇرلەرىن قوسىڭىز.
قوستانايلىقتاردىڭ, اسىرەسە, پاۋەرليفتينگكە دەگەن قىزىعۋشىلىعى ارتىپ كەلەدى. پاراليمپيا ويىندارىنا كىرەتىن بۇل سپورت تۇرىمەن بۇگىندە جيىرمادان استام زاعيپ اينالىسادى. سولاردىڭ ءبىرى – انار احانوۆا. تالاي حالىقارالىق جارىستارعا قاتىسىپ, ەل نامىسىن قورعاپ جۇرگەن انار بەس جىل ىشىندە حالىقارالىق سپورت شەبەرى اتاندى.
– قازىر بالالار مەن جاسوسپىرىمدەرگە ارنالعان ءبىرىنشى مەكتەپتە جاتتىعۋ جاساپ ءجۇرمىن. سپورتقا وسىدان بەس جىل بۇرىن كەلدىم. ول كەزدە تۇرمىستىق قىزمەت كورسەتۋ كوللەدجىندە وقيتىنمىن. العاشقىدا جاي اۋەسقويلىقپەن كەلە سالعانمىن, سپورتپەن كاسىبي تۇردە اينالىسامىن دەگەن وي مۇلدە بولعان جوق. العاشقى جاتتىعۋلاردا قاتتى قينالدىم. بوس تەمىر بەلدەمەنىڭ ءوزىن كوتەرە المايتىنمىن. ءتىپتى پاۋەرليفتينگتى تاستاپ كەتكىم دە كەلگەن كەزدەرىم بولدى. الايدا ءار نارسەگە ءتوزىم كەرەك ەكەنىن, ونسىز ەشتەمە شىقپايتىنىن بىلگەندىكتەن, العاشقى قيىندىقتاردىڭ بارىنە شىداپ باقتىم. ەڭبەگىم ەش كەتكەن جوق, بىرتىندەپ جارىستارعا قاتىسىپ, جاقسى كورسەتكىشتەرگە قول جەتكىزە باستادىم, – دەدى تاجىريبەلى سپورتشى.
پاراپاۋەرليفتينگ بويىنشا قوستاناي وبلىسىنىڭ اعا جاتتىقتىرۋشىسى دميتري تسارەنكونىڭ سوزىنە قاراعاندا, جاتتىعۋعا جاڭا كەلىپ جاتقان زاعيپ جانداردىڭ سپورتقا دەگەن ۇمتىلىسى ەرەكشە.
– سپورت زالعا بەس جىل بۇرىن كەلگەن بالالاردىڭ كوبى وسىدان بىردەمە شىعارامىن-اۋ دەگەن سەنىم بولمايتىن. سەنىم ەڭبەك ەتۋ ارقىلى بىرتە-بىرتە قالىپتاسادى. قازىر سولاردىڭ كوبىنىڭ سپورت شەبەرى دەگەن دارەجەسى بار. ومىرتقاسى, بۋىنى نەمەسە بۇلشىق ەتتەرى زاقىمدانىپ وزدىگىنەن جۇرە الماي قالعان بالالاردىڭ ءبىرازى ۇيلەرىندە وتىر. ولارعا سپورتپەن شۇعىلدانۋ قاجەت. ەڭ باستىسى, تاۋەكەلگە بەل بۋىپ, زالعا كەلىپ, اقىرىنداپ سپورتپەن اينالىسا باستاۋ كەرەك. ءبىزدىڭ كوماندامىز وتە ۇيىمشىل, زالعا كەلگەن كەز كەلگەن ادامعا قولداۋ كورسەتۋگە ءازىر تۇرادى, – دەدى د.تسارەنكو.
«مۇگەدەكتەر سپورت كلۋبى» باسشىسىنىڭ ورىنباسارى گريگوري زيبەروۆتىڭ ايتۋىنشا, سپورت جاتتىعۋلارى مۇمكىندىگى شەكتەۋلى جانداردىڭ فۋنكتسيونالدىق مۇمكىندىكتەرىن كەڭەيتىپ, دەنساۋلىعىن جاقسارتادى, ءتىپتى سپورتتا جوعارعى جەتىستىكتەرگە جەتەلەيدى. اتالعان كلۋب بۇگىندە كەمتارلاردى سپورتقا مەيلىنشە كوپتەپ تارتۋ ارقىلى ءىرى حالىقارالىق جارىستاردا جوعارى كورسەتكىشتەرگە قول جەتكىزە الاتىن كاسىبي سپورتشىلاردى دايارلاۋدى كوزدەپ وتىر. الايدا كلۋبتىڭ باستى ماقساتى – ەرەكشە قاجەتتىلىگى بار ازاماتتاردىڭ قوعامعا بەيىمدەلۋىنە جاعداي جاساۋ.
سوڭعى التى جىلعا كوز جۇگىرتىپ كورسەك, قوستاناي وبلىسىنىڭ ەرەكشە سپورتشىلارى رەسپۋبليكالىق جانە حالىقارالىق جارىستاردا ءجيى جەڭىس تۇعىرىنان كورىنىپ ءجۇر. ال الەكساندر كوليادين – 2018 جىلعى پاراليمپيا چەمپيونى. مۇنداي تابىسقا جەتۋگە وسى زالعا كەلىپ جۇرگەن كەز كەلگەن سپورتشىنىڭ مۇمكىندىگى بار دەيدى جاتتىقتىرۋشىلار.
قوستاناي وبلىسى