قازاقستان رەسەيمەن «سپۋتنيك لايت» ۆاكتسيناسىن جەتكىزۋ تۋرالى كەلىسسوزدەر جۇرگىزۋدە. بۇل تۋرالى قر دەنساۋلىق ساقتاۋ ءمينيسترى الەكسەي تسوي ءمالىم ەتتى, دەپ حابارلايدى Egemen.kz.
ء«بىز بۇل ماسەلەنى قاراستىرىپ جاتىرمىز. رەسەيلىك ارىپتەستەرىمىزدەن «سپۋتنيك لايت» ۆاكتسيناسىن جەتكىزۋ مۇمكىندىگى تۋرالى اقپارات سۇرالدى. بۇل, نەگىزىنەن «سپۋتنيك V», تەك جەكە ءبىرىنشى كومپونەنت», دەدى الەكسەي تسوي ۇكىمەت وتىرىسى اياسىندا.
مينيستر جەتكىزۋ مەرزىمى پىسىقتالىپ جاتقانىن ايتتى.
الەكسەي تسوي قاراعاندى فارماتسەۆتيكالىق كەشەنى «سپۋتنيك لايت» شىعارادى ما دەگەن سۇراققا جاۋاپ بەردى.
ء«يا, وندا تاجىريبەلى پارتيا شىعارىلدى. قازىر ءوندىرىس ماسەلەسى دە پىسىقتالۋدا. مەنىڭ بىلۋىمشە, العاشقى سىناق پارتيالارى ءساتتى ءوتتى, ولار وزدەرىنىڭ مالىمدەلگەن تالاپتارعا سايكەستىگىن راستادى», دەدى مينيستر.
سونداي-اق الەكسەي تسوي ۆاكتسينانىڭ اتالعان ءتۇرىن قانداي كولەمدە ساتىپ الۋعا نيەتتى ەكەنىن ايتتى.
ء«بىز كوممەرتسيالىق ۇسىنىس العاننان كەيىن, قانشا ۆاكتسينا جەتكىزۋگە بولاتىندىعىن تالقىلايمىز. قازىرگى ۋاقىتتا بىزگە ۇلكەن كولەم قاجەت ەمەس. جىل سوڭىنا دەيىن بىزدە رەۆاكتسيناتسيا ءۇشىن ۆاكتسينالار جەتكىلىكتى, ولار ەل ىشىندە بار», دەدى دەنساۋلىق ساقتاۋ مينيسترلىگىنىڭ باسشىسى.
الەكسەي تسوي حالىقتىڭ نەگىزگى بولىگىندە كەلەسى جىلى 6-9 ايعا ەگۋ مەرزىمى اياقتالاتىنىن ءتۇسىندىردى. سوندىقتان قازاقستانعا «سپۋتنيك لايت» ۆاكتسيناسىن جەتكىزۋ 2022 جىلعا جوسپارلانعان.