22-24 قاراشادا EXPO-2020 Dubai دۇنيەجۇزىلىك كورمەسىندەگى قازاقستان رەسپۋبليكاسىنىڭ ۇلتتىق پاۆيلونىندا شىمكەنت قالاسىنىڭ كۇندەرى ءوتىپ جاتىر, دەپ حابارلايدى Egemen.kz.
ءىس-شارالار اياسىندا ەلىمىزدىڭ ەڭ ءىرى وڭىرلەرىنىڭ ءبىرىنىڭ ءتۇرلى ىسكەرلىك جانە مادەني شارالارىن وتكىزۋ جوسپارلانعان. ءۇش كۇن بويى قازاقستاننىڭ وڭتۇستىك ءوڭىرىنىڭ مادەنيەتى, ونەرى, رۋحاني قۇندىلىقتارى مەن قوناقجايلىلىعى تانىستىرىلادى.
اشىلۋ سالتاناتىنا شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان, قالا اكىمىنىڭ ورىنباسارى ايبەك ساتتىباەۆ جانە شىمكەنت قالاسىنىڭ بيزنەس-قوعامداستىقتارىنىڭ دەلەگاتسياسى قاتىستى.
دۇنيەجۇزىلىك كورمە قوناقتارىنا جەرگىلىكتى تاۋار وندىرۋشىلەردىڭ, اتاپ ايتقاندا, ەلىمىزدە جانە شەتەلدە تانىمال Bal Textile, Akniet Pharmaceuticals كومپانياسىنىڭ ونىمدەرى تانىستىرىلىپ, سونداي-اق «ساندىق» ۇلتتىق تاعامدار مەيرامحاناسى كەلگەندەرگە ەسىگىن ايقارا اشتى.
سونىمەن قاتار قوناقتارعا ۆيرتۋالدى 3D-كوزىلدىرىك, تۋريستىك AR-كىتاپتار جانە يميدجدىك بەينەروليكتەر ارقىلى شىمكەنت قالاسىنىڭ تۋريستىك مۇمكىندىكتەرى كورسەتىلدى.
ءىس-شارا قورىتىندىسى بويىنشا الەمنىڭ ءتۇرلى ەلدەرىنەن كەلگەن قوناقتار مەن قاتىسۋشىلار وڭىرگە جوعارى قىزىعۋشىلىق تانىتىپ, وڭىرمەن بۇدان ءارى دە قىزمەتتىڭ ءارتۇرلى سالالارىندا حالىقارالىق ىنتىماقتاستىق ورناتۋدىڭ دامۋ الەۋەتىنە توقتالىپ وتكەنىن ايتا كەتكەن ءجون.