اقتوبە وبلىسىندا جۇقپالى مال اۋرۋى تاراپ جاتىر, دەپ حابارلايدى Egemen.kz.
بۇل تۋرالى كتك تەلەارناسى ءمالىم ەتتى.
العا اۋدانىندا ءىرى قارانىڭ سىلەكەيى اعىپ قىزۋى كوتەرىلسە, بۋىنى السىرەگەن قوي-ەشكىنى جۇرگىزبەي تاستايدى. بىراق بۇل ىندەتتەن مالعا دا, ادامعا دا قاۋىپ جوق دەيدى ماماندار.
العا اۋدانىنا قاراستى بەستاماق اۋىلىنىڭ تۇرعىندارى الاڭداۋلى. قوراسىنداعى قوي-ەشكىسىنەن باستاپ, ءىرى قاراسى بەلگىسىز ىندەتكە شالدىققان. بۇرىن اقىرداعى جەم-شوپتەن باس المايتىن ءتورت ت ۇلىگى ءبىر جۇتىم سۋ دا ىشپەي قالىپتى.
«اۋزىنان سۋ شۇبىرىپ تۇرادى. ءشوپ جەمەيدى. جەم جەمەيدى. سۋ ىشپەيدى. ىڭىرسىپ تۇرا بەرەدى. اۋەلدە سيىردى اۋسىل دەپ قورىقتىق. ءبارى دە سولاي دەدى. قويعا اياققا تۇسەدى, سيىردىڭ اۋزى سونداي بولادى», دەدى بەستاماق اۋىلىنىڭ تۇرعىنى احمادين مۇقاشوۆ.
بەلگىسىز كەسەلدەن تەك قانا ءىرى قارا مال ەمەس, ۇساق مالدار دا اۋىرعان. اسىرەسە قويدىڭ الدىڭعى ەكى اياعى بۇكتەتىلىپ, ەڭبەكتەپ جۇرە الماي قالعان.
بۇل ىندەتتەن بەستاماق اۋلىندا ازىرگە 7 باس مال ولگەن. دەگەنمەن تۇرعىندار ءوز بەتىنشە ەلدەن ەستىگەن ەم-دومىن جاساپ جاتىر. كەسەلدىڭ كەسىرىنەن مال ۇستاۋدان قورقىپ قالعانىن جاسىرمايدى.
جەرگىلىكتى شەنەۋنىكتەر بۇل كەسەلدەن مالعا دا, ادامعا دا قاۋىپ جوق دەپ وتىر. اۋرۋ بەلگىلەرى اۋسىلعا ۇقساعانىمەن, ونداي قاۋىپتى ەمەس دەپ سابىرعا شاقىرادى.
«ادام دەنساۋلىعىنا تىكەلەي اسەر ەتەتىن, ءيا بولماسا, تاعى دا ءبىر جۇقپالى ماسەلەلەر بويىنشا ەشقانداي دا فاكت تىركەلگەن جوق. راستالعان جوق. ۆەتەرينارلىق ۇلتتىق ورتالىققا جىبەرىپ, سىنامانىڭ قورىتىندىسى بويىنشا بۇل ينفەكتسيالىق رينوتراحەيت اۋرۋى دەپ انىقتالعان بولاتىن», دەدى العا اۋدانى اكىمىنىڭ ورىنباسارى مەيىرحان ەرماعانبەتوۆ.
بۇل اۋرۋ العا اۋدانىنىڭ بەستاماعىنان بولەك, كورشى ەكى اۋىلدا انىقتالدى. ىندەت مالدان مالعا جۇعادى. رينوتراحەيت جۇقتىرعان مال ءتول تاستايدى ەكەن. ساۋىندى سيىر بولسا, ءسۇتى قاشادى دەيدى ماماندار. ال ەتىن اۋرۋ جازىلعان سوڭ ەكى اپتادان كەيىن جەۋگە بولادى.