جىل وتكەن سايىن الماتى قالاسى مەشىتتەرىنىڭ جاماعاتى اراسىنداعى سپارتاكيادانىڭ اۋقىمى كەڭەيىپ كەلەدى. كۇنى كەشە نۇر-مۇباراك مىسىر يسلام مادەنيەتى ۋنيۆەرسيتەتىنىڭ الاڭىندا رۋحاني كەلىسىم كۇنىنە وراي ۇيىمداستىرىلعان سپورتتىق ءىس-شاراعا 2 مىڭعا جۋىق ادام قاتىستى. ولار ارقان تارتۋ, ارمرەستلينگ, كىر تاسىن كوتەرۋ, قوشقار كوتەرۋ, اسىق اتۋ, پەتانك, دوپتى قاقپاعا تەبۋ سەكىلدى سپورت تۇرلەرى بويىنشا باق سىنادى.
جينالعان جۇرتتىڭ ايرىقشا كوڭىلىنەن شىققانى «قوشقار كوتەرۋ» سايىسى بولدى. كۇش-قۋاتتارى تاسىعان مىقتىلار باسەكەسىندە قوشقاردى يىققا سالىپ 101 مارتە كوتەرگەن باۋىرجان ابدىقايىم جەڭىمپاز اتانسا, ەۆگەني كيم ەكىنشى ورىندى يەلەندى. ءۇشىنشى ساتىعا نۇربولات ەرتاس جايعاستى. كىر تاسىن كوتەرگەن بىلەكتى جىگىتتەر دە كوپشىلىكتى تامساندىردى. ءزىل باتپان تاستى 81 رەت اۋەلەتكەن ەركىن ەرىمبەتوۆ باس بايگەنى قانجىعاسىنا بايلاسا, اقجول جولداسباەۆ (80 رەت) پەن ۋرماتبەك يبراگيموۆ (60 رەت) كۇمىس پەن قولا مەدالدى ەنشىلەدى.
ارقان تارتۋ سايىسىندا تولە بي مەشىتىنىڭ كومانداسىنا تەڭ كەلەر ەشكىم تابىلمادى. فينالدا ولار اباي مەشىتىنىڭ سەركەلەرىن سان سوقتىرسا, ءال-مۇحامەد مەشىتىنىڭ جاماعاتى ءۇشىنشى ساتىعا تۇراقتادى. دوپتى قاقپاعا تەبۋدە جاندوس تۇرىسبەك مەرگەندىك تانىتسا, قۇرامىندا ازامات دۇيسەنباي, بەكزات ريجانوۆ جانە سايات مۇحامەتكارىم ونەر كورسەتكەن «نۇر-مۇباراك» كومانداسى پەتانك سايىسىندا جەڭىسكە جەتتى. ۇلتتىق ويىن – اسىق اتۋدا رايس جەڭىس ۇلى جەڭىمپاز دەپ تانىلدى. ال بىلەكتى جىگىتتەردىڭ باسەكەسى – ارمرەستلينگتە تولە بي مەشىتىنىڭ نامىسىن قورعاعان ابزال تىلەۋباەۆتىڭ تەگەۋرىنىنە ەشكىم شىداي المادى. جارىس اياقتالعان بەتتە جەڭىمپاز جانە جۇلدەگەر اتانعان جىگىتتەر باعالى سىيلىقتارمەن ماراپاتتالدى.
– جاماعات اراسىنداعى جارىستارعا كوپشىلىكتىڭ ىقىلاسى جىل ساناپ ارتىپ كەلەدى. بيىل فۋتبول, ۆولەيبول جانە مەرەكە كۇندەرىنە ورايلاستىرىلعان ءتۇرلى سپارتاكيادالار وتكىزدىك. قاتىسۋشىلاردىڭ دا, كورەرمەندەردىڭ دە قاراسى مول بولدى. اتالعان ءىس-شارانىڭ نەگىزگى ماقساتى – مەشىت جاماعاتى اراسىندا دەنە شىنىقتىرۋ مەن سپورتتى جانە سالاماتتى ءومىر سالتىن ناسيحاتتاۋ, سونىمەن قاتار يسلامنىڭ ءداستۇرلى ەمەس اعىمىنىڭ جەتەگىندە جۇرگەن جاندارعا اسىل ءدىننىڭ وڭ جولىن كورسەتۋ. وسىنداي سپورتتىق سايىستار ارقىلى ەلدىڭ رۋحى كوتەرىلىپ, مەشىت جاماعاتىنىڭ بىرلىگى نىعايا تۇسسە دەگەن تىلەك بار, – دەيدى جارىستى ۇيىمداستىرۋشى ءاليا شايحان.