ەلىمىزدىڭ ەڭ ۇزدىك دزيۋدوشىلارى ورالدا باس قوسىپ, قازاقستان چەمپيوناتىنىڭ جۇلدەلەرىن ساراپقا سالدى. وسى جارىس بارىسىندا بىرقاتار وزگەرىستىڭ بولعانىن بايقادىق. ماسەلەن, وليمپيا ويىندارى مەن الەم چەمپيوناتىنىڭ جۇلدەگەرى وتگونتسەتسەگ گالبادراح جانە قۇرلىقتىق دودالاردا سان مارتە جۇلدە العان ەلدوس جۇماحانوۆ بۇل باسەكەگە قاتىسقان جوق. كۇنى كەشە عانا ولار ۇلكەن سپورتتان كەتكەندەرىن جاريا ەتتى. سونداي-اق ۇلتتىق كوماندامىزدىڭ كەيبىر مۇشەلەرى وزگە سالماقتاردا سايىسقا ءتۇسۋدى قۇپ كورگەن ەكەن.
ەرلەر اراسىنداعى جارىستا قازاقستاننىڭ ءبىرىنشى ءنومىرلى دزيۋدوشىلارى اراسىنان تەك 73 كگ سالماقتا كۇش سىناسقان جانساي سماعۇلوۆ ءوزىنىڭ مىقتىلىعىن مويىنداتا الدى. بارلىق قارسىلاسىن قاپى قالدىرعان قاراعاندىلىق بالۋان فينالدا تارازدىق دانيار شامشيەۆتى شاڭ قاپتىردى. بۇعان دەيىن 66 كگ سالماق دارەجەسىندە كۇرەسكەن شىعىس قازاقستان وبلىسىنىڭ وكىلى ەرلان سەرىكجانوۆقا بىردەن جاڭا سالماققا بەيىمدەلۋ وڭاي بولماعان سەكىلدى. الەم چەمپيوناتىنىڭ كۇمىس جۇلدەگەرى جانە ازيا چەمپيونى دەگەن اتاقتارى بار سپورتشى ەل بىرىنشىلىگىندە قولا مەدالدى قاناعات تۇتتى.
اسا جەڭىل سالماقتاعى باسەكەلەردى دە جانكۇيەرلەر تاعاتسىزدانا كۇتتى. سەبەبى ەلدوس سمەتوۆ پەن عۇسمان قىرعىزباەۆ سىندى ساڭلاقتار بۇل جارىسقا قاتىسپادى. جانە دە كەلەسى جىلدان باستاپ ولار سالماقتارىن وزگەرتۋگە بەل بۋعان ەكەن. ياعني جايىق جاعالاۋىندا جارىس جاڭا چەمپيوندى انىقتادى. بۇل مۇمكىندىكتى ماعجان شامشادين ۇتىمدى پايدالاندى. بيىل بۋداپەشتتە وتكەن الەم چەمپيوناتىندا بەسىنشى ورىنعا تۇراقتاعان سىر بويىنىڭ سايىپقىرانى فينالدا ماڭعىستاۋلىق باۋىرجان نارباەۆتان ايلاسىن اسىردى.
66 كگ سالماقتا ەرمەك امانگەلديەۆتىڭ اسىعى الشىسىنان ءتۇستى. ەسىمى جانكۇيەرلەرگە جاقسى تانىس رينات يبراگيموۆ تاتاميمەن قوش ايتىسقاننان كەيىن اتىراۋ وبلىسىنان مىقتى ءبىر دزيۋدوشىنىڭ شىقپاعانىنا ءبىراز جىلدىڭ ءجۇزى بولعان ەدى. مىنە, ەندى ەرمەك ەرلەپ, التىن تۇعىردان قول بۇلعادى. فينالدا ول شىعىس قازاقستان وبلىسىنان كەلگەن داستان شاياحمەتوۆتەن باسىم ءتۇستى.
81 كگ سالماقتا جامبىل وبلىسىنىڭ ورەنى بەكادىل شايمەردەنوۆ وزسا, 90 كگ-دا اقتوبەلىك ادىلەت ءميسيننىڭ مەرەيى ۇستەم بولدى. اۋىر جانە اسا اۋىر سالماق دارەجەلەرىندە قىزىلوردالىق نۇرلىحان شارحان مەن ورالدىق عالىمجان كولباي باس جۇلدەنى ولجالادى.
ال ايەلدەر اراسىنداعى سايىستا اتىراۋلىق ابيبا ابۋجاقىنوۆا (48 كگ), ورالدىق گاۋھار يرماعانبەتوۆا (52 كگ), شىمكەنتتىكتەر سەۆارا نىشانباەۆا (57 كگ), ساەرا مىرزاحمەتوۆا (63 كگ), زەرە بەكتاسقىزى (70 كگ), ارۋنا جانگەلدينا (78 كگ) جانە كاميلا بەرلىقاش (+78 كگ) التىننان القا تاقتى.