ەلىمىزدە 5G ينتەرنەت جەلىسىن ورناتۋدىڭ ارقاسىندا ونىڭ ساپاسى ەسەلەنە تۇسپەك. بۇل تۋرالى قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين ءمالىم ەتتى, دەپ حابارلايدى Egemen.kz.
«2022-2023 جىلدارى ەلىمىزدە 5G ينتەرنەت جەلىسى ورناتىلادى. ءبىز 3 قالادا 5G جۇيەسىنىڭ كومەگىمەن جوعارى ساناتتى ينتەرنەتتى ۇسىناتىن بولامىز. بۇگىندە ەلىمىزدىڭ كەيبىر وڭىرلەرىندە ينتەرنەت جىلدامدىعى جوعارى, سول كورسەتكىش بارلىق جەردە بولۋى كەرەك. ال قازىرگى بار 4G ينتەرنەت جەلىسىنىڭ ساپاسى بىرنەشە ەسەگە دەيىن ارتادى. تيىسىنشە ەلىمىزدە جوعارى جىلدامدىققا يە ينتەرنەت پايدا بولادى.
قازىردىڭ وزىندە 4G-ءدىڭ ارقاسىندا ينتەرنەتتە جاڭا مۇمكىندىكتەر, ءتىپتى جاڭا الەۋمەتتىك جەلى پايدا بولىپ جاتىر. ال 5G ينتەرنەت جەلىسىنىڭ مۇمكىندىگى ودان دا كوپ», دەدى باعدات مۋسين حابار تەلەارناسىندا وتكەن «ناتسيونالنىي ينتەرەس» تەلەباعدارلاماسىنىڭ ەفيرىندە.