قازاقستان تۇركىتىلدەس مەملەكەتتەرگە ساۋدانى دامىتۋ ءۇشىن بىرلەسىپ جۇمىس ىستەۋدى ۇسىندى. تاياۋدا ىستانبۇلدا تۇركيا مەن تۇركىتىلدەس ەلدەر اراسىنداعى ساۋدا-ەكونوميكالىق بايلانىسقا ارنالعان كونفەرەنتسيا وتكەن ەدى.
ساۋدا جانە ينتەگراتسيا مينيسترلىگىنىڭ مالىمەتىنە سايكەس, تۇركىتىلدەس مەملەكەتتەردىڭ ىنتىماقتاستىق كەڭەسىنە (تمىك) مۇشە ەلدەر اراسىندا تاۋار اينالىمى قارقىندى بولعانىمەن ونىڭ كورسەتكىشى ماردىمسىز. ايتالىق, بۇگىندە باۋىرلاس مەملەكەتتەر جىل سايىن شامامەن 15 ملرد دوللار سوماسىنا ءوزارا ساۋدا جاساسىپ كەلەدى. بۇل رەتتە مۇناي-حيميا, مەتاللۋرگيا, ماشينا جاساۋ جانە جەڭىل ونەركاسىپ ءوزارا ساۋدانىڭ نەگىزگى قوزعاۋشى تەتىگىنە اينالعان. ولاردىڭ كولەمى شامامەن 9,2 ملرد دوللاردى قۇرايدى.
ساۋدا جانە ينتەگراتسيا مينيسترلىگىنە قاراستى QazTrade ساۋدا ساياساتىن دامىتۋ ورتالىعى باس ديرەكتورىنىڭ ورىنباسارى نۇرلان قۇلباتىروۆتىڭ ايتۋىنشا, ساۋدا بايلانىستارىن نىعايتۋ ءۇشىن تمىك ەلدەرىنىڭ بىرلەسكەن جۇمىسىن كۇشەيتۋ قاجەت.
«ەكسپورتتى ءتيىمدى ىلگەرىلەتۋ, ساۋدا الەۋەتىن نىعايتىپ, ءوزارا بايلانىستاردى كۇشەيتۋ ءۇشىن ىنتىماقتاستىق پەن ساۋدا سالاسىندا جاردەمدەسۋدىڭ ورنى بولەك. باۋىرلاس ەلدەردىڭ جانە تۇتاستاي ءوڭىردىڭ ساۋدا الەۋەتىن ارتتىرۋ ماقساتىندا بىرلەسە جۇمىس ىستەگەن ءتيىمدى», دەدى QazTrade-ءتىڭ وكىلى.
ن.قۇلباتىروۆ ۇيىمعا مۇشە مەملەكەتتەر اراسىنداعى ساۋدانى دامىتۋدىڭ امالى رەتىندە ۋاكىلەتتى ۇيىمداردىڭ تۇراقتى ءىس-ارەكەتىن رەتتەۋدى, ءوزارا ساۋدانىڭ جاعدايىنا بىرلەسكەن مونيتورينگ جۇرگىزۋدى جانە قازىرگى بار كەدەرگىلەرگە تالداۋ جاساپ, تۇركىتىلدەس ەلدەردىڭ ساۋداسىنا جىل سايىن ارنايى شولۋ دايىنداۋدى ۇسىندى.
«بۇل ۇيىمداعى ناتيجەلەر تۋرالى ناقتى كورنەكى مالىمەتتەرگە قول جەتكىزۋگە جانە ساۋداداعى كەدەرگىلەردى جويۋدا ۋاقتىلى شارالار قابىلداۋعا مۇمكىندىك بەرەدى», دەدى ن.قۇلباتىروۆ.
ساۋدا ساياساتىن دامىتۋ ورتالىعىنىڭ وكىلى ايتقانداي, وڭىرلىك ۇيىمداردىڭ بىرلەسكەن ءىس-قيمىلدارى پاندەميادان كەيىنگى داعدارىستى ەڭسەرىپ, تۇراقتى دامۋ باعىتىندا اسا ماڭىزدى.