قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا شىمكەنت قالاسىنىڭ قورعانىس ىستەرى جونىندەگى دەپارتامەنتىندە «قارۋلى كۇشتەردىڭ ارداگەرلەرى» شىمكەنت قالالىق فيليالى رەسپۋبليكالىق قوعامدىق بىرلەستىگىنىڭ تۋىن تابىس ەتۋ ءراسىمى ءوتتى, دەپ حابارلايدى Egemen.kz.
ءىس-شاراعا شىمكەنت گارنيزونىنىڭ اسكەري ءبولىم كومانديرلەرى مەن مەكەمە باستىقتارى, سونداي-اق ارداگەرلەر قوعامدىق بىرلەستىكتەرىنىڭ توراعالارى قاتىستى.
راسىمدە «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى توراعاسىنىڭ ورىنباسارى گەنەرال-مايور مارات ناعىمانوۆ شىمكەنت قالاسى فيليالىنىڭ توراعاسى زاپاستاعى پولكوۆنيك سەرىكباي ونباەۆقا بىرلەستىكتىڭ قۇرىلعانىنا 10 جىل تولۋى جانە ەل تاۋەلسىزدىگىنىڭ 30 جىلدىعى قارساڭىندا جاستاردى اسكەري-پاتريوتتىققا تاربيەلەۋدە اتقارعان جۇمىستارىن وڭ باعالاپ, بىرلەستىكتىڭ تۋىن سالتاناتتى تۇردە تابىس ەتتى.
«10 جىل ىشىندە بىرلەستىك قارۋلى كۇشتەردىڭ كوپتەگەن قۇرامىمەن, بولىمىمەن, قورعانىس مينيسترلىگى دەپارتامەنتتەرىمەن تىعىز بايلانىس ورناتتى. ارداگەرلەر قارۋلى كۇشتەردىڭ بارلىق الەۋمەتتىك ماڭىزى بار شارالارىنا قاتىستى. ولار اسكەرگە شاقىرىلۋ الدىنداعى جانە اسكەر قاتارىنا شاقىرىلاتىن جاستارمەن كەزدەسۋلەر وتكىزىپ, جوعارى وقۋ ورىندارىندا, كوللەدجدەردە, ورتا جانە ارنايى مەكتەپتەردە ءتالىم تاربيە كورسەتتى. جاستارمەن جاقىن قارىم-قاتىناس ورناتىپ, ولاردىڭ بويىندا ەلىمىزدىڭ تاريحىنا دەگەن ماقتانىش سەزىمىن قالىپتاستىرۋعا اتسالىستى جانە اسكەري ماماندىققا دەگەن قىزىعۋشىلىقتارىن وياتتى», دەدى گەنەرال-مايور مارات ناعىمانوۆ ءوز سوزىندە.