بۇل تۋرالى ءبىلىم جانە عىلىم ءمينيسترى اسحات ايماعامبەتوۆ قازاقستاننىڭ X ازاماتتىق فورۋمىنا جولداعان بەينەۇندەۋىندە ايتتى, دەپ جازادى Egemen.kz.
«ۇەۇ ءبىلىم بەرۋ جۇيەسىن دامىتۋدا جانە اسىرەسە بالالاردىڭ قۇقىقتارىن قورعاۋدا ماڭىزدى ءرول اتقارادى. ۇيىم ۇسىنعان باستامالار جاڭا جوبالاردى جۇزەگە اسىرۋعا, سونداي-اق ءبىزدىڭ سالاداعى وزەكتى ماسەلەلەردى شەشۋگە كومەكتەسەدى», دەيدى اسحات ايماعامبەتوۆ.
مينيستر بالالاردىڭ قۇقىقتارىن قورعاۋ سالاسىندا جۇزەگە اسىرىلىپ جاتقان بىرلەسكەن جوبالاردى ەرەكشە اتاپ ءوتتى.
«مىسالى, انالار ءۇيى جوباسى. ول بىزگە بالالار ۇيلەرىنىڭ سانىن ايتارلىقتاي قىسقارتىپ, وتباسىندا تاربيەلەنەتىن بالالاردىڭ بالامالى شەشىمىن ەنگىزۋگە كومەكتەستى. بۇگىندە مەملەكەتتىك جانە ۇكىمەتتىك ەمەس ۇيىمداردىڭ بىرلەسكەن جۇمىسىنىڭ ارقاسىندا 18 مىڭنان استام جەتىم بالا وتباسىندا تاربيەلەنۋدە. ال قازىردىڭ وزىندە ونداعان بالالار ءۇيى جابىلدى. سونىمەن بىرگە ۇيىم ەرەكشە ءبىلىم بەرۋ قاجەتتىلىكتەرى بار بالالار ءۇشىن ينكليۋزيۆتى قوعامدى جانە قولايلى ورتانى قۇرۋعا قاتىسادى. «دارا», «بولاشاق», «اسىل ميراس» جانە باسقا دا قورلارمەن ىنتىماقتاستىق اياسىندا ءبىز ونداعان رەسۋرستىق ورتالىق پەن ينكليۋزيا كابينەتىن اشتىق», دەپ اتاپ ءوتتى ايماعامبەتوۆ.
مينيستر قوعام قايراتكەرلەرىنىڭ ۇسىنىسىمەن بارلىق مەكتەپتە اسسيستەنت لاۋازىمىن ەنگىزىلگەنىن ايتتى.
«قازىر ەلىمىزدىڭ بارلىق ايماعىندا 700-دەن استام وسىنداي مامان ەرەكشە قاجەتتىلىكتەرى بار بالالارمەن جۇمىس ىستەيدى. اۋتيزم ورتالىقتارىن قۇرۋ بويىنشا «اسىل ميراس» جوباسىن دا اتاپ وتكىم كەلەدى. ولار ءبىلىم جانە عىلىم مينيسترلىگى بەكىتكەن ارنايى ءبىلىم بەرۋ ۇيىمدارىنىڭ تىزىمىنە ەندى. مينيسترلىك الداعى ۋاقىتتا دا اشىقتىق پەن ءوزارا ءتيىمدى ىنتىماقتاستىق ساياساتىن ۇستانۋدى جالعاستىرادى», دەپ ايتتى ءبىلىم ءمينيسترى.