پاۆلودار وبلىسىنىڭ تۋريزم جانە سپورتتى دامىتۋ باسقارماسىنا جاڭا باسشى كەلدى

وبلىس اكىمى ءباسپاسوز قىزمەتىنىڭ مالىمەتىنە سەنسەك, ايماق باسشىسى ابىلقايىر سقاقوۆ ءتيىستى وكىمگە قول قويعان.

وسى جىلدىڭ ءساۋىر ايىنان بەرى ءداۋىر ەرعابۋلوۆ پاۆلودار وبلىسىنىڭ ءتۋريزمدى جانە سپورتتى دامىتۋ جونىندەگى باسقارماسى باسشىسىنىڭ ورىنباسارى لاۋازىمىن اتقارىپ, ۆەدومستۆو باسشىنىڭ مىندەتىن ورىنداعان ەدى.

ءداۋىر قۋات ۇلى 1990 جىلى تۋعان. 2012 جىلى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىن «زاڭگەر», 2015 جىلى «ەكونوميكا» ماماندىقتارى بويىنشا اياقتاعان. 2018 جىلى «نارحوز» ۋنيۆەرسيتەتىن «مەنەدجمەنت» ماماندىعى بويىنشا اياقتادى. 2012-2014 جىلدارى پاۆلودار اۋدانى اكىمىنىڭ اپپاراتىندا ەڭبەك ەتتى. 2016-2017 جىلدارى پاۆلودار وبلىسى دەنە شىنىقتىرۋ جانە سپورت باسقارماسى «استانا» مۇز سارايى مەكەمەسى ديرەكتورىنىڭ ورىنباسارى قىزمەتىن اتقاردى. 2019 جىلى ءجۇزۋ بويىنشا وليمپيادالىق رەزەرۆتىڭ مامانداندىرىلعان بالالار-جاسوسپىرىمدەر مەكتەبىنىڭ سپورت عيماراتىنىڭ باسشىسى بولدى. 2019-2021 جىلدارى پاۆلودار قالاسىنىڭ دەنە شىنىقتىرۋ جانە سپورت ءبولىمىنىڭ باسشىسى بولىپ جۇمىس ىستەدى.

ءداۋىر ەرعابۋلوۆ - قازاقستان رەسپۋبليكاسىنىڭ مۋايتاي بويىنشا حالىقارالىق ساناتتاعى سپورت شەبەرى, 2011 جىلعى مۋايتاي بويىنشا الەم چەمپيوناتىنىڭ قولا جۇلدەگەرى, مۋايتايدان قازاقستان رەسپۋبليكاسىنىڭ بىرنەشە دۇركىن چەمپيونى.