كانادادا نوسەر جاۋىن مەن داۋىل سالدارىنان وزەندەر تاسىپ, ءبىراز جەردى سۋ باسىپ قالدى. سونىڭ سالدارىنان مىڭداعان ادام ۇيلەرىن تاستاپ كەتۋگە ءماجبۇر بولدى.
جول جابىلىپ قالعاندىقتان ۇيلەرىنەن شىعا الماي قالعاندار دا كوپ. بىرنەشە قالا تولىعىمەن بايلانىسسىز قالدى. بالشىق پەن كوشكىن نەگىزگى تاس جولداردىڭ ءبىر بولىگىن قيراتتى. بريتاندىق كولۋمبيا شتاتىنىڭ پرەمەر-ءمينيسترى سارسەنبىدە توتەنشە جاعداي جاريالادى. اسكەريلەر جاپا شەككەندەرگە كومەكتەسۋگە جىبەرىلدى.
كاناداداعى ەڭ ۇلكەن ۆانكۋۆەر پورتى بارلىق تەمىرجول قاتىناسىن توقتاتتى. ال قالانىڭ كانادانىڭ قالعان بولىگىمەن قاتىناسى ءۇزىلىپ قالدى. قازىرگى تاڭدا كەم دەگەندە ءبىر ادامنىڭ قايتىس بولعانى راستالدى, ءىز-ءتۇزسىز جوعالعاندار دا جەتەرلىك.
بۇل ايماققا قىركۇيەكتەن بەرى ەرەكشە مول جاڭبىر جاۋدى. مەتەورولوگتەر ونى «داۋىلدار شەرۋى» دەپ اتايدى. ۆاشينگتون شتاتىنداعى بەللينگەمدە سەنبى مەن دۇيسەنبى ارالىعىندا ورتاشا ەسەپپەن قاراشا ايىندا تۇسەتىن جاۋىننان كوپ جاڭبىر جاۋعان.
كانادانىڭ قارۋلى كۇشتەرى ەۆاكۋاتسيا جۇمىستارىنا كومەكتەسۋ ءۇشىن قاتتى زارداپ شەككەن ايماقتارعا 4000 اسكەر جىبەردى. پرينستون قالاسىنىڭ بيلىگى تازا سۋ مەن تابيعي گازدىڭ جەتىسپەۋشىلىگىنە بايلانىستى ەۆاكۋاتسيا تۋرالى ەسكەرتۋ جاريالادى.
كانادامەن شەكارادا ورنالاسقان اقش-تىڭ ۆاشينگتون شتاتىنداعى شاعىن قالا سۋماستى دا جارتىلاي سۋ باستى. مۇنداعى سۋ تاسقىنى ۇيلەردىڭ تورتتەن ءۇش بولىگىن باسىپ قالدى. شامامەن 500-گە جۋىق قۇتقارۋشى جۇمىلدىرىلىپ, ەۆاكۋاتسيالاۋ جۇمىستارى جۇرگىزىلىپ جاتىر.