ۇلتتىق قوعامدىق سەنىم كەڭەسىنىڭ كەزەكتى التىنشى وتىرىسىندا مەملەكەت باسشىسى قاسىم-جومارت توقاەۆ بىرنەشە ماڭىزدى باستامانى جاريا ەتتى. كەڭەس جۇمىسىنا بىرنەشە ايماقتان ونلاين قوسىلعان ارىپتەستەرىمىز كوكەيدە جۇرگەن كوپتەگەن ماڭىزدى ماسەلەنى كوتەرىپ, وي-پىكىرىن ورتاعا سالدى.
ءبىزدىڭ ارىپتەستەرىمىز, ساياسي رەفورمالار توبىنداعى كەڭەستىڭ مۇشەلەرى الەكساندر دانيلوۆ, مارات شيبۇتوۆ جانە گۇلميرا يلەۋوۆا اۋىل اكىمدەرىنىڭ سايلاۋ پروتسەستەرىنە قاتىسىپ, ەلىمىزدىڭ بىرنەشە وڭىرىنە ارنايى ىسساپارمەن بارىپ قايتقان ەدى. اۋىل اكىمدەرىنىڭ سايلاۋ ءتارتىبىن باقىلاۋدى ماقسات تۇتقان وسى ساپارلاردىڭ قورىتىندىسى بويىنشا ولار بىرنەشە ساراپتاما جازعان بولاتىن. وتكەن جولى ارىپتەستەرىمىز وسى وزەكتى ماسەلەگە قاتىستى تولىق اقپاراتتى ءبىزدىڭ نازارىمىزعا ۇسىنىپ, باسقوسۋدا ءوزارا تالقىعا سالىپ, پىكىر الماسقانبىز. اسىرەسە, كەڭەس مۇشەلەرىنىڭ اۋىل əكىمى ۇمىتكەرلىگىنە ارناۋلى ورتا ءبىلىمى بار ازاماتتارعا رۇقسات بەرەتىن نورمانى بەكىتۋ جونىندەگى ۇسىنىسى كەڭىنەن ءسوز بولعان ەدى.
وسى رەتتە ساياسي رەفورمالار توبىنداعى كەڭەس مۇشەلەرى ورتاعا سالعان ۇسىنىستارى وتە ورىندى ءارى ماڭىزدى دەپ سانايمىن. سەبەبى اۋىل اكىمدەرىن سايلاۋ مەحانيزمى – قازىرگى تاڭدا وتە ماڭىزدى تۇيتكىلدەردىڭ ءبىرى. ۋاقىت وتە بۇل باعىتتاعى جۇمىستار, قولعا الىنعان ءىس-شارالار ءوزىنىڭ وڭ ناتيجەسىن بەرىپ كەلەدى. مۇنى كەشە ەل پرەزيدەنتى «پارتيالاردىڭ بەلسەندىلىك تانىتۋى, ءوزىن ءوزى ۇسىنعان ازاماتتاردىڭ كوپتىگى جانە سايلاۋشىلاردىڭ داۋىس بەرۋگە كوپتەپ كەلۋى بۇل رەفورمانىڭ ورىندى ەكەنىن ءارى ۋاقتىلى قولعا الىنعانىن كورسەتتى. مۇنىڭ ءبارى ۇلتتىق قوعامدىق سەنىم كەڭەسى ۇسىنعان باستامالاردىڭ ءبىر بولىگى عانا. ونى جۇزەگە اسىرۋ قازاقستاندىقتاردىڭ تۇرمىسىنا تىكەلەي اسەر ەتىپ, مەملەكەتتىك باسقارۋ ءىسىنىڭ ساپاسىن جاقسارتادى» دەپ اتاپ ءوتىپ, كەڭەس مۇشەلەرىنىڭ ۇسىنىسىن ءبىراۋىزدان قولدادى. ارينە, سايلاۋ پروتسەستەرىنىڭ ءالى دە جەتىلدىرەتىن تۇستارى بار. مەملەكەت باسشىسى دا بۇل ۇسىنىستاردىڭ الداعى ۋاقىتتا سايلاۋ ءتارتىبىن وڭتايلاندىرا ءتۇسۋ ءۇشىن وتە قاجەت ەكەنىن اتاپ ءوتتى.
مەملەكەت باسشىسىنىڭ كەڭەس وتىرىسىندا اۋىل اكىمدەرىن سايلاۋعا قاتىستى ايتقان جاڭاشىلدىعى, ياعني اۋىل اكىمدەرى سايلاۋىنا ورتا ءبىلىمى بار ازاماتتارعا تۇسۋگە جاعداي جاساۋ تۋرالى ۇسىنىسى كوڭىل قۋانتادى. ويتكەنى ورتا ءبىلىمى بار ازاماتتاردىڭ دا سايلاۋعا قاتىسۋى بۇل اكىمدىككە ۇمىتكەرلەر سانىن بىرنەشە ەسەگە ارتتىرادى. ەلىمىزدىڭ كوپتەگەن اۋىل-ايماعىندا كادر تاپشىلىعى ايقىن سەزىلەدى جانە مۇنى بارشامىز جاقسى بىلەمىز. ال مۇنداي جاڭا باستاما اۋىل اكىمدەرى سايلاۋىنىڭ باعاسىن ارتتىرىپ قانا قويماي, تۋعان اۋىلىن كوركەيتەمىن دەگەن ازاماتتار ءۇشىن زور مۇمكىندىك ەكەنى ءسوزسىز.
اسحات سادىرباي,
ۇلتتىق قوعامدىق
سەنىم كەڭەسىنىڭ مۇشەسى