سەنات توراعاسى ماۋلەن اشىمباەۆ ەلىمىزدە ءىرى كاسىپورىندارعا بەرىلەتىن سالىقتىق جەڭىلدىكتەردى جان-جاقتى زەردەلەۋ كەرەكتىگىن ايتتى, دەپ حابارلايدى Egemen.kz.
«ۇكىمەت ۇلكەن جۇمىس جاساپ جاتىر. بۇل جۇمىستاردىڭ بارلىعىن دەپۋتاتتار دا قولدايدى. وسى جۇمىستاردىڭ اياسىندا الداعى ۋاقىتتا سالىقتىق جەڭىلدىكتەردى دە ءبىر ساراپتاپ قويعان ارتىق بولمايتىن شىعار دەپ ەسەپتەيمىز. جالپى, ءبىزدىڭ قولىمىزداعى اقپاراتقا سايكەس, 2020 جىلى سالىقتىق جەڭىلدىكتەرگە بايلانىستى بيۋدجەت ءتۇسىمى 4,8 ترلن تەڭگەدەن استام سوماعا كەم بولدى. بۇل ۇلكەن سوما. نەگىزگى سالىقتىق جەڭىلدىكتەر شاعىن كاسىپورىندارعا ەمەس, ۇلكەن كاسىپورىندارعا بەرىلىپ جاتقانى بەلگىلى», دەدى ول سەناتتىڭ جالپى وتىرىسىندا.
سەنات سپيكەرىنىڭ دەرەگىنشە, وسى جەڭىلدىكتەردىڭ 40 پايىزى قارجى جانە تاۋ-كەن ءوندىرۋ سالاسىنداعى كاسىپورىندارعا تيەسىلى بولىپ وتىر.
«بۇل رەتتە سالىقتىق جەڭىلدىكتەردەن باس تارتايىق دەگەن اڭگىمە جوق. ول حالىقارالىق تاجىريبە. ونى قولدانۋىمىز كەرەك, وسى باعىتتا جۇمىس ىستەۋىمىز كەرەك. دەگەنمەن وسى جەڭىلدىكتەر مەملەكەتىمىزگە نە بەرىپ جاتىر؟ ەكونوميكامىزعا قانداي اسەرىن تيگىزەدى؟ سونى دا ءبىر ساراپتاپ قويعان ارتىق بولماس. وسى جىلدىڭ باسىندا پرەزيدەنت سالىق كودەكسىنە تۇگەندەۋ جاساۋ كەرەكتىگىن ايتقان بولاتىن. وسى جۇمىستىڭ اياسىندا سالىقتىق جەڭىلدىكتەردى دە جان-جاقتى زەردەلەيسىزدەر دەپ سەنەمىز. سول جۇمىستىڭ قورىتىندىسى بويىنشا پارلامەنتكە اقپارات بەرەسىزدەر دەپ ۇمىتتەنەمىز», دەدى ماۋلەن اشىمباەۆ.