قر ءبىلىم جانە عىلىم ءمينيسترى اسحات ايماعامبەتوۆ ۆەدومستۆونىڭ اپپارات ماجىلىسىندە پەداگوگتەردى ارتىق ەسەپتىلىكتەن بوساتۋدى تاپسىردى, دەپ حابارلايدى Egemen.kz.
«مۇعالىمدەر ءۇشىن ەكى قۇجات قانا مىندەتتى. ول جايىندا №130 بۇيرىق بار. مۇعالىمدەر كۇندەلىكتى تولتىراتىن ەكى قۇجات قانا بار. ەگەر الەۋمەتتىك پەداگوگ بولسا, ءوزىنىڭ قۇجاتتارى بار. سىنىپ جەتەكشىسى بولسا, تاريبە جۇمىستارى بويىنشا قۇجاتتارى بار. ديرەكتوردىڭ ءوزى جۇرگىزەتىن قۇجاتتار بار. ونىڭ ءبارى جاڭاعى ايتقان بۇيرىقتا شەگەلەنىپ تۇرىپ بەكىتىلگەن. تەك وسى تالاپ شەڭبەرىندە جۇمىس ىستەۋ كەرەك. اسىرەسە سىنىپ جەتەكشىلەرى بويىنشا ويعا قونىمسىز قۇجاتتاردى كىرىگىزىپ قويعان. ءبىر مەكتەپتە سىنىپ جەتەكىشسىنىڭ موينىنا 19 قۇجاتتى جۇكتەپ قويعان. وسى فاكت بويىنشا انىقتاۋ جۇرگىزىپ, ءتيىستى جاۋاپكەرشىلىككە تارتۋدى تاپسىرامىن», دەگەن مينيستر باسى ارتىق قۇجاتتىڭ پايداسىنان زيانى كوپ ەكەنىن ەسكەرتتى.
«كەرەك ەمەس. مۇنى كىم وقيدى؟ كوپ ماسەلەلەر ەلەكتروندى فورماتتا بار. ۇلتتىق ءبىلىم بەرۋ دەرەكتەر قورىندا بار. ءبارىن شىعارىپ, جيناپ قويعاننان نە پايدا؟ قاجەت ەمەس, ءتىپتى تۇسىنىكسىز اقپاراتتى سۇرايسىزدار. وڭىرلەردەگى ءبىلىم باسقارمالارى قۇزىرىنداعى شارۋانى يەگەرە الماي وتىر ما سوندا؟ كەلەسى جولى مۇنداي نەگىزسىز قۇجات تالاپ ەتۋ قايتالانسا, مەكتەپ ديرەكتورىن ەمەس, ءبىلىم بەرۋ ءبولىمى مەن باسقارمالارىنىڭ باسشىلارىن جاۋاپقا تارتۋ كەرەك», دەدى اسحات ايماعامبەتوۆ.