شىعىس قازاقستاندا ەكىنشى بەسجىلدىقتا ترانسۇلتتىق كومپانيالارمەن بىرلەسكەن 5 جوبا ىسكە قوسىلادى. بۇگىنگى كۇننىڭ وزىندە وڭىردە اۆتوكولىك جاساۋدا – «رەنو-نيسسان», مەتاللۋرگيادا – الەمدىك كوشباسشىلار ساناتىنان تابىلاتىن «Posco», گەولوگيالىق بارلاۋدا «ريو تينتو» جوبالارى قولعا الىندى.
كەشە پرەمەر-ءمينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ شىعىس قازاقستان وبلىسىنداعى جۇمىس ساپارىن «ازيا-اۆتو قازاقستان» زاۋىتىنان باستادى. ۆيتسە-پرەمەر جىلىنا 120 مىڭ اۆتوكولىك شىعارۋعا قۋاتى جەتەتىن زاۋىت پەن اۆتوبولشەكتەر وندىرەتىن تەحنوپارك قۇرىلىسىمەن تانىستى. «ازيا-اۆتو» اتالعان جوبانى «رەنو-نيسسان» اليانسىمەن بىرىگىپ جۇزەگە اسىرۋدا. جوبا قۇنى – 74,5 ملرد. تەڭگە. ونىڭ ىشىندە 14,5 ملرد. – ءوز قارجىسى بولسا, قالعان بولىگى ەۋرازيا دامۋ بانكى مەن ەۋروپا قايتا قۇرۋ جانە دامۋ بانكىنىڭ زايمدارى. بۇل نىساندى كەلەسى جىلى پايدالانۋعا بەرۋ جوسپارلانعان. سول كەزدە 4 مىڭ تۇراقتى جۇمىس ورنى قۇرىلماق. ءونىمنىڭ جارتىسى ەكسپورتقا شىعارىلادى.
تاعى ءبىر ينۆەستيتسيالىق جوبا – تيتان قۇيمالارىن وندىرەتىن «پوسۋك تيتانيۋم» جشس. بۇل جوبانى جەرگىلىكتى تيتان-ماگني كومبيناتى كورەيلىك ارىپتەستەرىمەن بىرگە جۇزەگە اسىرۋدا. قۇنى – 7,384 ملرد. تەڭگە. جوبا جەتەكشىلەرىنىڭ ايتۋىنشا, زاۋىت 2016 جىلى ىسكە قوسىلادى.
ءا.يسەكەشەۆ مەملەكەت باسشىسىنىڭ تاپسىرماسىنا سايكەس, ۇكىمەتتىڭ وڭدەۋشى ونەركاسىپكە, ءاسىرەسە تيتان-ماگني كومبيناتىنا شەتەلدىك ينۆەستيتسيانى تىكەلەي تارتۋ جۇمىستارىن جانداندىرۋعا كىرىسكەنىن جەتكىزدى.
– ءبىز, يندۋستريالىق-يننوۆاتسيالىق جوبالار ءۇشىن الەمدىك باسەكەلەستىكتىڭ ارتۋى ينۆەستورلاردى تارتۋدىڭ جاڭا شەشىمدەرىن ءىزدەستىرۋدى قاجەت ەتەتىنىن كورىپ وتىرمىز. بۇل – ينۆەستيتسيالىق كليماتتى جاقسارتۋدان عانا تۇرمايدى, ونىمەن بىرگە ترانسۇلتتىق كومپانيالار اراسىنان بەلدى كومپانيا-ينۆەستورلاردى تارتۋ ماسەلەلەرىن دە قامتيدى. بۇل ءۇشىن قازىر ۇكىمەتتە ينۆەستورلارعا ارنالعان جاڭا ىنتالاندىرۋ پاكەتى تالقىلانىپ جاتىر, – دەدى ول.
ءوندىرىس الاڭدارىن ارالاپ بولعان سوڭ ءا.يسەكەشەۆ پەن ءوڭىر باسشىسى بەردىبەك ساپارباەۆ ۇدەمەلى يندۋستريالىق-يننوۆاتسيالىق دامۋ قورىتىندىلارى جانە يندۋستريالاندىرۋدىڭ ەكىنشى بەسجىلدىعىنىڭ باسىمدىقتارىن سارالاعان جيىن وتكىزدى.
– شىعىس قازاقستان – ەلىمىزدىڭ مەتاللۋرگيالىق ورتالىقتارىنىڭ ءبىرى. سوڭعى كەزدە وڭىردە ماشينا جاساۋ سالاسى جەدەل دامىپ كەلەدى. سونىمەن بىرگە وبلىستىڭ دامۋىنا جاڭا سەرپىن بەرەتىن وزگە دە سەكتورلاردى ساراپتاۋ قاجەت, – دەدى ءا.يسەكەشەۆ.
پرەمەر-ءمينيستردىڭ ورىنباسارى يندۋستريالاندىرۋ كارتاسى جوبالارىنىڭ تولىق قۋاتىندا جۇمىس ىستەۋى, سونداي-اق, جوبا ساپاسىنىڭ جوعارى بولۋى وتە ماڭىزدى ماسەلە ەكەنىن اتاپ ءوتتى. يندۋستريالاندىرۋ كارتاسى شەڭبەرىندە 4 جىلدا جالپى سوماسى 190,7 ملرد. تەڭگەگە 37 جوبا ىسكە قوسىلدى. 3,7 مىڭ جۇمىس ورنى قۇرىلدى. بيىل تاعى 14 جوبانى جۇزەگە اسىرىپ, 1,5 مىڭ جۇمىس ورنىن قۇرۋ جوسپارلانىپ وتىر.
جيىننىڭ قورىتىندىسىندا ەكى قۇجاتقا قول قويىلدى. شىعىس قازاقستان وبلىسى اكىمدىگى مەن يندۋستريا جانە جاڭا تەحنولوگيالار مينيسترلىگى تۋريزم سالاسىنداعى ارىپتەستىكتى دامىتۋ تۋرالى, سونداي-اق اتالعان مينيسترلىك پەن «قازتسينك» جشس گەولوگيا سالاسىنداعى ءارىپتەستىكتى دامىتۋ جونىندەگى مەموراندۋمدار قابىلدادى. بۇل قۇجاتتار «ۇلكەن التاي – ورتالىق ازياداعى بىرەگەي كەندى ايماق» جوباسىن جۇزەگە اسىرۋ شەڭبەرىندە شىعىس قازاقستان اۋماعىنداعى مينەرالدى-شيكىزاتتىق بازانى ۇلعايتۋ جانە گەولوگيالىق بارلاۋ باعدارلاماسىنىڭ تيىمدىلىگىن ارتتىرۋعا باعىتتالعان.
مەموراندۋمعا سايكەس, «قازتسينك» كاسىپورنى 2014-2018 جىلدار ارالىعىندا بەس جىل بويى 15 ملرد. تەڭگەدەن كەم ەمەس قارجىعا قازاقستان تەرريتورياسىندا گەولوگيالىق بارلاۋ جۇمىستارىن جۇرگىزۋدى قارجىلاندىرۋ مىندەتىن الدى. گەولوگيالىق بارلاۋ جۇمىستارىن جۇرگىزۋ ءۇشىن مينيسترلىك گەولوگيا جانە جەر قويناۋىن پايدالانۋ كوميتەتىمەن بىرگە كەندى التايداعى جەر قويناۋىن پايدالانۋ قۇقىن قامتاماسىز ەتەدى.
«قازتسينك» جانە «ريو تينتو» كاسىپورىندارىمەن كەلىسىمگە سايكەس, الداعى جىلدارى گەولوگيالىق بارلاۋ جۇمىستارىنا 30 ملرد. تەڭگەگە جۋىق قاراجات قۇيۋ جوسپارلانىپ وتىر.
ۇكىمەت باسشىسىنىڭ ورىنباسارى جۇمىس ساپارىنىڭ سوڭىندا شىعىس قازاقستاننىڭ تۋريستىك ءمۇمكىندىكتەرى كورسەتىلگەن كورمە جۇمىسىمەن تانىستى.
دۋمان اناش.
وسكەمەن.