وزبەكستان حالقى كونستيتۋتسيا بويىنشا جالپىۇلتتىق ەمتيحان تاپسىرادى

ەلدىڭ ادىلەت مينيسترلىگىنىڭ مالىمەتىنە قاراعاندا, مينيسترلىك كونستيتۋتسيالىق سوتپەن بىرلەسىپ, ازاماتتاردىڭ كونستيتۋتسيانى ءبىلۋ دەڭگەيىن تەكسەرۋ ءۇشىن جالپىۇلتتىق كونستيتۋتسيالىق ەمتيحان وتكىزبەك.

ەمتيحانعا 15 جاستان اسقان بارلىق ازامات قاتىسا الادى جانە ول ەرىكتى تۇردە, تەگىن سونىمەن قاتار بارلىعىنا اشىق بولماق. جوسپارعا ساي ەمتيحان ەكى كەزەڭمەن ۇيىمداستىرىلادى. ءبىرىنشى كەزەڭ 1 جەلتوقسان كۇنى تاشكەنت ۋاقىتىمەن ساعات 9:00-دەن 13:00-گە دەيىن ونلاين رەجيمدە وتەدى. وسى ارالىقتا قاتىسۋشىلارعا 20 تەست سۇراعى جانە 1 شىعارماشىلىق سۇراق بەرىلەدى. ەكىنشى كەزەڭ كونستيتۋتسيا كۇنى قارساڭىندا ءوتىپ, ونلاين ترانسلياتسيالانادى. ءار قاتىسۋشىعا 10 سۇراق قويىلادى.

سوڭىندا ەڭ جوعارى ناتيجە كورسەتكەن 3 قاتىسۋشى جەڭىمپاز اتانادى. جەڭىمپازدار اقشالاي سىيلىقپەن ماراپاتتالادى: ءى ورىن – 15 ميلليون سۋم (602 409 تەڭگە); ءىى ورىن – 10 ميلليون سۋم (401 606 تەڭگە); ءىىى ورىن – 5 ميلليون سۋم (200 803 تەڭگە).