الاش ارداقتىسى احمەت بايتۇرسىن ۇلىنىڭ 150 جىلدىق مەرەيتويىن اتاپ ءوتۋ ءۇشىن مەملەكەت باسشىسى قاسىم-جومارت توقاەۆتىڭ جارلىعىمەن مەملەكەتتىك كوميسسيا بەكىتىلىپ, رەسپۋبليكالىق جوسپار ازىرلەنگەنى بەلگىلى. جوسپاردا بەلگىلەنگەن 60 شارانىڭ 23-ءى وبلىس اكىمدىكتەرىنە جۇكتەلىپ وتىر.
وسىعان وراي, قوستاناي وبلىسىنىڭ اكىمى ارحيمەد مۇحامبەتوۆ ارنايى كەڭەس وتكىزىپ, احمەت بايتۇرسىن ۇلىنىڭ 150 جىلدىعىن مەرەكەلەۋگە دايىندىق ماسەلەسىن تالقىلادى.
قوستاناي وبلىسىنا كەلەسى جىلى احاڭنىڭ مەرەيتويىنا ارنالعان 8 ءىس-شارا ۇيىمداستىرۋ تۋرالى مىندەت جۇكتەلگەن. بيىلدىڭ وزىندە قاراسۋ اۋىلى احمەت بايتۇرسىن ۇلى اۋىلى بولىپ وزگەرتىلدى, سونداي-اق جانگەلدين اۋدانىنىڭ كولىك ينفراقۇرىلىمىن جاقسارتۋ بويىنشا 1 ملرد تەڭگەدەن استام قارجىعا بىرنەشە جوبا ىسكە اسىرىلدى. اتاپ ايتقاندا, اۋدان ورتالىعى تورعاي اۋىلىنداعى احمەت بايتۇرسىن ۇلى كوشەسى اباتتاندىرىلدى, شۇبالاڭ, قاراسۋ, كوكالات اۋىلدارىنىڭ اراسىنداعى جول جوندەۋدەن ءوتتى, سونداي-اق بىرنەشە كوشەگە جوندەۋ جۇرگىزىلدى. سونىمەن قاتار جەرگىلىكتى حالىقتىڭ ءوتىنىشى بويىنشا اقكول مەن ا.بايتۇرسىن ۇلى اۋىلدارىن جانە باسقا دا ينجەنەرلىك نىساندى جالعايتىن ۇلى جىلانشىق وزەنى ارقىلى كوپىر سالىندى.
– اتالعان ءىس-شارالاردان باسقا, قالا مەن اۋدان اكىمدىكتەرىنە رەسپۋبليكالىق جانە وبلىستىق جوسپارلاردا كوزدەلگەن بارلىق عىلىمي-اعارتۋشىلىق, مادەني-بۇقارالىق جانە باسقا دا يميدجدىك ءىس-شارانىڭ ورىندالۋىن قامتاماسىز ەتۋ تاپسىرىلدى. مەرەيتويلىق كۇندى يۋنەسكو اياسىندا حالىقارالىق دەڭگەيدە اتاپ ءوتۋ جوسپارلانۋدا. وسىعان بايلانىستى حالىقارالىق عىلىمي-تاجىربيەلىك كونفەرەنتسيالار, احمەت بايتۇرسىن ۇلىنىڭ تۋعان جەرىنە عىلىمي-تانىمدىق ەكسپەديتسيا ۇيىمداستىرۋ جوسپارلانعان. جانگەلدين اۋدانىنىڭ مادەنيەت باسقارماسى جانە اكىمدىگىمەن بىرلەسىپ ماۋسىمدىق-تاريحي جانە ارت-الاڭ اشۋ ماسەلەسى قاراستىرىلۋدا, سونداي-اق ا.بايتۇرسىن ۇلىنا ارنالعان ۆيزيت-ورتالىقتىڭ مازمۇنى مەن فورماتى بويىنشا پىسىقتاۋ جۇرگىزىلۋدە, – دەدى وبلىس اكىمى.
مۇنىڭ سىرتىندا, 2022-2023 وقۋ جىلىندا جەرگىلىكتى بيۋدجەت قاراجاتى ەسەبىنەن «التىن بەلگى» يەگەرلەرىنە وبلىس ءۇشىن ماڭىزدى پەداگوگيكالىق جانە ينجەنەرلىك-تەحنيكالىق ماماندىقتار بويىنشا احمەت بايتۇرسىن ۇلى اتىنداعى گرانتتار بەرىلەتىن بولادى. سونداي-اق قوستاناي, ارقالىق قالالارى مەن اۋليەكول, جانگەلدين اۋداندارىندا ورنالاسقان ا.بايتۇرسىن ۇلى ەسكەرتكىشتەرىنە اعىمداعى جوندەۋ جۇرگىزىلەدى.
قوستاناي وبلىسى