اقىل-وي ونىمدەرىنىڭ ەكسپورتى

«عىلىم قورى ءوزىنىڭ 15 جىل­دىعىن اتاپ ءوتىپ جاتىر. سوڭعى ەكى جىلدا 130-عا جۋىق جوبا قارجىلاندىرىلدى. قور – عىلىمي جانە عىلىمي-تەحني­كا­لىق قىزمەت ناتيجەلەرىن كوم­­مەرتسيالاندىرۋعا ارنال­عان جوبالاردى گرانتتىق قار­جى­لاندىرۋ بويىنشا وپەراتورى. بۇگىنگى تاڭدا ءبىز 113 عىلىمدى قاجەتسىنەتىن ءوندىرىستى ىسكە قوستىق, ونىڭ 14-ءى ءونىم ەكسپورتىنا شىعارىلدى. 1,5 مىڭعا جۋىق جۇمىس ورنى قۇرىلدى. زياتكەرلىك مەنشىك اۆتورلارى مەن عىلىمي ازىرلەمەلەردى پايدالاناتىن كاسىپورىندار اراسىندا 45 ليتسەنزيالىق كەلىسىم جاسالدى», دەپ اتاپ ءوتتى عىلىم قورى باسقارماسىنىڭ توراعاسى ارىن ورساريەۆ.

يادرولىق فيزيكا ينستي­تۋ­تى­نىڭ عالىمدارى كوبا­لت-57 راديواكتيۆتى يزوتوپىن ارزان باعامەن ءوندىرۋدىڭ جاڭا تەحنولوگياسىن جاسادى. بۇل ءونىم يادرولىق مەديتسينادا, عىلىمي زەرتتەۋلەرگە ار­نالعان قۇرالداردى وندىرۋدە مەديتسينالىق توموگرافتاردىڭ جۇمىس ىستەۋ ساپاسىن باقىلاۋ ءۇشىن قولدانىلادى. جوبا كوم­مەرتسيالاندىرىلدى جانە وتان­دىق عالىمداردىڭ تەحنولوگيا­سى بويىنشا كوبالت-57 يزو­تو­پىنىڭ ەرىتىندىسى ونەركاسىپ ءوندىرىسىنىڭ كولەمىندە شىعارىلا باستادى. قازاقستاندىق ءونىم حالىقارالىق نارىققا شىعىپ, بۇگىندە كوبالت راديويزوتوپى پارتياسى رەسەيگە جەتكىزىلۋدە.

مەملەكەتتىك قولداۋدىڭ ناتي­جەسىندە قازاقستاندىق عا­لىمدار شەتەلدىك عالىم­دارمەن قاتار مەديتسينا, نانو جانە بيوتەحنولوگيا, جاساندى ينتەللەكت, گەولوگيا, مينەرالدىق جانە كومىرسۋتەكتى شيكىزاتتى قايتا وڭدەۋ, اۋىل شارۋاشىلىعى ونىمدەرىنىڭ قاۋىپسىزدىگى جانە ەكولوگيا سالالارىنداعى زاماناۋي ازىرلەمەلەرگە قاتىسىپ جاتىر. عىلىم قورىنىڭ قول­داۋىمەن ەلىمىزدە جەل جانە كۇن ەنەرگياسىن وندىرەتىن بىرەگەي گەنە­راتورلار ءوندىرىسى جولعا قو­يىلعان.

«قوندىرعى سىرتقى قۋات كوزىن قوسۋدى قاجەت ەتپەيدى, نە­گىزگى جانە رەزەرۆتىك قۋات كوزى رەتىندە پايدالانىلادى. سو­نىمەن قاتار ەلەكتر جەلى­سى­نەن الىس ورنالاسقان نىسان­داردى قۋاتپەن جابدىقتاۋ ماسەلەسىن شەشۋ­گە مۇمكىندىك بەرەدى. جەل گەنەراتورلارى جەلگە, دا­ۋىل­عا, مۇز قاتۋعا, تومەن تەم­پە­راتۋراعا ءتوزىمدى. اتالعان گەنە­راتورلاردى جەرگىلىكتى جەر­دىڭ گەوگرافيالىق جانە كلي­مات­تىق ەرەكشەلىكتەرىنە قا­را­­ماستان پايدالانۋعا بولادى. قوندىرعىلار ۇلكەن سۇرا­نىس­قا يە, بۇگىنگى تاڭدا ساتىلىم كولەمى 100 ملن تەڭگەدەن استى», دەدى جوبا جەتەكشىسى جانبولات مۇزباەۆ.

ميكروبيولوگيا جانە ۆيرۋسولوگيا ينستيتۋتىنىڭ عا­لىم­دارى زەڭگە قارسى «رو­زەو­فۋنگين-اس» پرەپاراتىن ويلاپ تاپتى. جاقپا تەرى ميكوزدارىن ەمدەۋگە ارنالعان جانە جوعارى تيىمدىلىگىن كور­سەتتى. پرەپارات بىرەگەي قۇرا­مى­مەن جانە زەڭگە قارسى اسەر ەتۋ سپەكترىنىڭ كەڭدىگىمەن ەرەك­شە­لەنەدى. «روزەوفۋنگين-اس» پرە­پاراتى دياگنوستيكالاۋ مەن ەمدەۋدىڭ كلينيكالىق حاتتاماسى دارىلەرىنىڭ تىزىمىنە جانە قازاقستاندىق ۇلتتىق دارىلىك فورمۋليارىنا كىردى.