تاكسي جۇرگىزۋشىسى لاڭكەستىك ارەكەتتىڭ الدىن الدى

مەرسيسايد وكرۋگىنىڭ پوليتسياسى ليۆەرپۋلدەگى ايەلدەر اۋرۋحاناسى عيماراتىنىڭ جانىندا كولىكتىڭ جارىلعانى تۋرالى حابارلادى. وقيعا سالدارىنان ءبىر ادام قايتىس بولىپ, تاعى بىرەۋى زارداپ شەككەن. دەرەكتەرگە سەنسەك, جارىلىس عيمارات ماڭىنا جەتكەن اۆتوكولىك ىشىندە بولعان.

بۇگىندە بۇل لاڭكەستىك ارەكەت بويىنشا تەرگەۋ امالدارى ءجۇرىپ جاتىر. پوليتسيانىڭ تەرروريزمگە قارسى بولىمشەسى جۇمىس ىستەۋدە. تەرروريزم تۋرالى زاڭعا سايكەس 21, 26 جانە 29 جاستاعى ءۇش ەر ادام كۇدىكتى رەتىندە ۇستالدى.

«تاكسي جۇرگىزۋشىسى قايعىلى وقيعانىڭ الدىن الدى. ول تەرروريستتى اۆتوكولىگىنە قاماپ, حالىقتى ۇلكەن اپاتتان قۇتقاردى», دەيدى جەرگىلىكتى باق. بولجام بويىنشا, جانكەشتى ءوزىن-ءوزى جارىپ جىبەرگەن.

جۇرگىزۋشىنىڭ دوسى دەيۆ پەرري «Daily Mail» باسىلىمىنا حابارلاعانداي, جانكەشتىنىڭ باستاپقى ماقساتى ليۆەرپۋلدەگى ءدىني عيمارات بولعان, وندا ەسكە الۋ كۇنى قۇرمەتىنە وراي كوپتەگەن ادام جينالعان.

«جولاۋشى دەۆيدتەن ءدىني عيباداتحاناعا بارۋدى وتىنگەن. سوندىقتان ءبىز بۇل ونىڭ باستى ماقساتى دەپ سانايمىز. بىراق ولار كولىك كەپتەلىسىنە تاپ بولعان. سول سەبەپتى جولاۋشى ءدىني عيماراتتىڭ ورنىنا اۋرۋحاناعا بارۋدى وتىنگەن», دەيدى ول.

الەۋمەتتىك جەلىلەردە تاكسي جۇرگىزۋشىسىنىڭ تاعى ءبىر دوسى ستيۆەن توماستىڭ پىكىرى پايدا بولدى. ول «جۇرگىزۋشى جولاۋشىنىڭ ءوزىن كۇماندى ۇستاعانىن بايقاپ, سودان كەيىن كولىكتەن سەكىردى» دەدى. الايدا بۇل پىكىر راستالعان جوق.

باق كەلتىرگەن مالىمەتتەرگە سەنسەك, تاكسي جۇرگىزۋشىسى ومىرگە قاۋىپ توندىرمەيتىن جاراقات العان.