قر دەنساۋلىق ساقتاۋ مينيسترلىگى «پيلوتتىق رەجيمدە قازاقستان رەسپۋبليكاسىندا تاندەمدى ماسس-سپەكترومەتريا ادىسىمەن الماسۋدىڭ تۇقىم قۋالايتىن اۋرۋلارىنا نەوناتالدىق سەلەكتيۆتى سكرينينگ جۇرگىزۋ بويىنشا پيلوتتىق جوبانى ەنگىزۋ تۋرالى نۇسقاۋلىقتى بەكىتۋ تۋرالى» بۇيرىق جوباسىن دايىندادى, دەپ حابارلايدى Egemen.kz.
نۇسقاۋلىق تاندەمدى ماسس-سپەكترومەتريا ادىسىمەن الماسۋدىڭ تۇقىم قۋالايتىن اۋرۋلارىنا نەوناتالدىق سەلەكتيۆتى سكرينينگتى جاڭا تۋعان نارەستەنىڭ نەوناتالدىق سكرينينگى باعدارلاماسىنا ەنگىزۋدىڭ ورىندىلىعىن انىقتاۋ ماقساتىندا ازىرلەندى.
تۇقىم قۋالايتىن اۋرۋلارعا نەوناتالدىق سەلەكتيۆتى سكرينينگ جۇرگىزۋ جونىندەگى پيلوتتىق جوباعا دەنساۋلىق ساقتاۋ مينيسترلىگى ايقىنداعان مەديتسينالىق ۇيىمدار مەن زەرتحانالار قاتىسادى.
پيلوتتىق جوبانى ىسكە اسىرۋدىڭ ۇيلەستىرۋشىسى «پەدياتريا جانە بالالار حيرۋرگياسى عىلىمي ورتالىعى» اق بولىپ تابىلادى.
پيلوتتىق جوبانى 2022 جىلعى 1 قاڭتاردان باستاپ 2022 جىلعى 30 ماۋسىمعا دەيىن ىسكە قوسۋ جوسپارلانىپ وتىر.
«نبو-عا سەلەكتيۆتى سكرينينگ پيلوتتىق جوباعا قاتىساتىن مەديتسينالىق ۇيىمدا ستاتسيونارلىق ەمدەلۋدە جۇرگەن 0-دەن 28 كۇنگە دەيىنگى جاڭا تۋعان نارەستەلەردە جۇرگىزىلەدى», دەلىنگەن قۇجاتتا.
جاڭا تۋعان بالانىڭ قان ۇلگىلەرىن تاندەمدى ماسس-سپەكترومەترياعا جىبەرۋ تۋرالى شەشىمدى پيلوتتىق جوباعا قاتىساتىن مەديتسينالىق ۇيىم ماماندارىنىڭ كونسيليۋمى قابىلدايدى.
تالداۋ ناتيجەلەرى قان ۇلگىلەرىن جىبەرگەن مەديتسينالىق ۇيىمعا بەرىلەدى.
پيلوتتىق جوباعا قاتىساتىن مەديتسينالىق ۇيىمداردىڭ ءتىزىمىن «اشىق نقا» سايتىنان كورۋگە بولادى, وندا قۇجات 21 قاراشاعا دەيىن جاريا تالقىلاۋ ءۇشىن ورنالاستىرىلعان.