«ءبىر, ەكى, ءۇش...» نەمەسە اكادەميانىڭ العاشقى جوباسى

ۆوكالدىق مۋزىكا كەشىن اكادە­ميا­نىڭ تۇساۋكەسەرى ءارى ونىڭ تىڭ­­داۋشىلارىنىڭ ەلوردالىق وپە­را­سۇيەر قاۋىممەن العاشقى تا­نىس­تىعى دەسەك تە بولادى. ال كون­تسەرت­تىك باعدارلامانىڭ «UNO, DUE, TRE…» دەگەن اتاۋى بەكەر تاڭ­دال­ماعان, ول حالىقارالىق اكادە­ميا تىڭ­داۋشىلارىنىڭ كۇردەلى ءارى تا­نىم­دىق ءبىلىم الۋ ۋاقىتىنىڭ باس­تاۋى ىسپەتتى.

وقۋ ءۇردىسى باستالعان ءبىر اي ۋاقىت ىشىندە جاس سوليستەر تاجى­ري­بەلى ۇستازدار اناتولي گۋ­سەۆ پەن فرانچەسكو مەددانىڭ جەتەك­شى­لىگىمەن ايگىلى اۆتورلاردىڭ وپەرالارىنان ۇزىندىلەر ازىرلەدى.

– بويىمدا قۋانىش تا, قوبال­جۋ دا بار. ءانشىنىڭ ساحناعا ءاربىر شى­­عۋى – تولقۋ, ال شاكىرتتەرىمىز ءان سالعان كەزدە, بۇل مەن ءۇشىن دە وتە جاۋاپتى ءسات: مەن دە ولارمەن بىرگە ۋايىمدايمىن, قوبالجيمىن. ءبىز ءۇشىن العاشقى ايدا جاساعان جۇمىسىمىزدى كورسەتۋ وتە ماڭىز­دى. دەسە دە جاڭا ۇستازدان ساباق الۋ ءۇشىن بۇل كەزەڭ وتە از. داۋىس ۇنە­مى جۇمىس ىستەۋدى, دۇرىس باپتاۋدى جانە مۇقيات كۇتىپ, قاراۋدى قاجەت ەتەتىن قۇرال, – دەپ اتاپ ءوتتى وپەرا اكادەمياسىنىڭ ۇستازى, وپەرالىق ءان ايتۋ بويىنشا يتاليالىق ماەس­ترو فرانچەسكو مەددا.

حالىقارالىق وپەرا اكادەميا­سىندا وقۋ مەرزىمى ەكى جىلعا ەسەپتەلگەن. جاڭا جوبانىڭ نەگىزگى مىن­دەتى – وپەرالىق ورىنداۋشىلىق ونەر­دىڭ دەڭگەيىن كوتەرۋ, ونەر جولىنا قادام باسقان دارىن يەلەرى­نىڭ الەۋەتىن اشۋعا كومەكتەسۋ. جوبا جە­­تەكشىسىنىڭ ايتۋىنشا, مۇندا ۇز­دىك وتاندىق جانە شەتەلدىك پەدا­گوگ­تارمەن ساباقتار كۇن سايىن وتكىزىلەدى. وندا ۆوكالدىق تەحني­كا جانە اكتەرلىك شەبەرلىكپەن جۇ­مىس ىستەۋ, يتاليان ءتىلىن ۇيرەنۋ قام­تىلعان. سونداي-اق اكادەميا بولا­شاق ارتىستەرگە قازاقستاننىڭ وپەرا ونەرىن شەتەلدەردە پاش ەتۋ ءۇشىن الەمنىڭ جەتەكشى ساحنالارىندا ونەر كورسەتۋگە مۇمكىندىك بەرۋدى ماق­سات ەتىپ وتىر.

– جوبا جۇمىسىنىڭ العاشقى وقۋ ايى ارتتا قالدى. اتقارىلعان جۇمىستىڭ شاعىن قورىتىندىسىن جاساپ, كوپشىلىك نازارىنا جاس ورىن­داۋشىلاردى تانىستىرۋ ءساتى دە كەلىپ جەتتى. بۇل ونەر كور­سە­تۋ «ASTANA OPERA حا­لىق­ارا­لىق وپەرا اكادەمياسى ۇسى­نا­دى» دەگەن اتاۋمەن كونتسەرت­تەر­دىڭ جاڭا توپتاماسىنا جول اشا­دى دەپ سەنەمىز. بۇگىنگى كون­تسەرتىمىزدە كورەرمەندەرگە ارناپ ۆ.موتسارت, ۆ.بەلليني, دج.روس­سيني, گ.دونيتسەتتي, دج.ۆەر­دي, ر.لەونكاۆاللو مەن پ.چايكوۆ­سكيدىڭ تۋىندىلارىنان قۇ­رال­عان قىزىقتى باعدارلاما ازىر­لەندى. شىعارمالاردىڭ باسىم كوپ­شىلىگى جالپى تەاتر رەپەرتۋارى­نا ەنبەگەن. دەمەك تىڭدارمان قاۋىم وسىناۋ تۋىندىلاردى جاس انشى­لەردىڭ ورىنداۋىندا العاش رەت ەستي­دى. جاڭا داۋىستار تىڭدارمان جۇرەگىنەن ورىن تاۋىپ, ەستەن كەتپەس مۋزىكالىق كەش سىيلايدى دەگەن ۇمىت­تەمىز, دەدى قازاقستاننىڭ ەڭ­بەك سىڭىر­گەن قايراتكەرى, ASTANA OPERA حالىقارالىق وپەرا اكادە­مياسىنىڭ كوركەمدىك جەتەكشىسى تيمۋر ۋرمانچەەۆ.

كونتسەرت تاقىرىبى – دۋەتتەر, تەرتسەتتەر جانە وپەرالاردان ان­سام­بلدەر. انسامبلدىك ورىن­داۋ­­شىلىق بارىنشا وي جيناق­تى­­لىعىن, داۋىستى مەڭگەرۋ مەن ءان اي­تۋ­داعى سەرىكتەستىكتى سەزىنۋ­دى قا­جەت ەتەدى. مۇنىڭ ءبارى شە­بەر­­­لىك دەڭگەيىنىڭ كورسەتكىشى. ان­سام­بلدە ءان ايتا ءبىلۋ – ءوز ءومى­­رىن وپەرامەن ۇشتاستىرۋدى ويلا­عان بارلىق انشىلەرگە قاجەتتى ما­ڭىز­دى قادام. اكادەميانىڭ تىڭ­داۋ­شىلارى مەن ۇستازدارى لي­ري­­كالىق, درامالىق جانە ءتىپتى ءازىل كو­رى­نىستەرىنەن تۇراتىن ءتۇرلى سيپات­تاعى باعدارلاما ازىرلەپتى.

– شىعارمالاردى جاتتاۋ, ءوز كەيىپ­­كەرىن ءون بويىنان وتكىزۋ جا­نە كوم­پوزيتور ارقاۋ ەتكەن ەمو­­تسيا­لار شوعىرىن داۋىسپەن جەت­كىز­ە ءبىلۋ ءۇشىن انشىلەرىمىزدىڭ دا­يىن­دىعىنا ءبىر اي ۋاقىت بەرىلدى. ان­سام­بلدە ءان ايتۋدان بولەك, مۋ­زى­كانى دۇرىس جەتكىزىپ, وعان جا­نىڭ­نىڭ ءبىر بولشەگىن سالۋ كەرەك, سون­دا ول بىرەگەي دۇنيەگە اينالادى. رە­پەر­تۋاردى تاڭداۋ كەزىندە ەكى جا­نە ودان دا كوپ ءارتىس قاتىساتىن تۋىن­­دىلاردىڭ ۇزىندىلەرىنە بەكەر با­سىم­دىق بەرىلگەن جوق. ويت­كەنى جاس ورىنداۋشىلاردى ساح­نادا ارىپتەستەرمەن ءوزارا ءىس-قي­مىل جاساۋ, انسامبلدە جۇمىس ىس­تەي الۋ, سەرىكتەستى ەستۋ سىندى وپە­­را ونەرى زاڭدىلىقتارىنا باۋ­لى­عى­مىز, كاسىبي شەبەرلىگىن شىڭ­داعى­مىز كەلدى. بۇلاردىڭ بار­لىعى كاسى­بي مامانعا وتە قاجەت ءارى ما­ڭىز­دى داعدىلار, دەدى وپەرا اكا­دە­مياسىنىڭ ۇستازى, وپەرالىق ءان ايتۋ ماەستروسى اناتولي گۋسەۆ (يتاليا).

حوش, سونىمەن وتىز كۇنگە سو­زىل­عان ءۇزىلسسىز ءارى ءجىتى دايىن­دىق ساحنادا ءوز جەمىسىن بەردى. اكا­دەميانىڭ تىڭداۋشىلارى كورە­مەنىنە كەرەمەت مۋزىكا كەشىن تار­تۋ ەتتى. اتاپ ايتساق, كۇردەلى ساح­نالىق كورىنىستەردىڭ ءبىرى – ۆ.مو­تسارتتىڭ «دون جۋان» وپەرا­سىنان كوماندوردىڭ ءولىمىن ۆالە­ري سەليۆانوۆ, دىنمۇحامەد كوش­كىن­باەۆ جانە جانداربەك ەركىن­باەۆ جوعارى دەڭگەيدە ورىندادى. گ.دونيتسەتتيدىڭ «ماحاببات سۋسى­نى» وپەراسىنان نەمورينو – نۇرقانات تاپيەۆ پەن دۋلكامارا – شىڭعىس راسىلحاننىڭ دۋەتى ەستە قالارلىقتاي اسەر ەتتى. پ.چايكوۆ­سكيدىڭ «پيكوۆايا داما» وپەراسىنان «باقتاشى ايەلدىڭ ادالدىعى» كوستيۋمدى كورىنىسى كەشتىڭ جارقىن قورىتىندىسىن جاسادى. ونداعى سۇيكىمدى پريلەپانىڭ ءرولىن گۇل­دانا الدادوسوۆا ورىنداسا, ميلوۆ­زور بەينەسىندە ەلميرا شپەكباەۆا ونەر كورسەتتى. ال ونىڭ باقتالاسى زلاتوگوردى – ازات مالىك سومدادى.

– مەن ءۇشىن ءاربىر ونەر كورسەتۋ – ءاردايىم مەرەكە. ساحنا – بۇل مەنىڭ ءومىرىم. ءبىز, انشىلەر, جەكە ورىندايتىن تۋىندىلاردى جاقسى كورەمىز, الايدا وپەرالاردا انسامبلدەر, دۋەتتەر, تەرتسەتتەر كوپ, سوندىقتان ولاردى ورىنداي ءبىلۋ وپەرالىق سپەكتاكلدەرگە قاتىسۋ ءۇشىن وتە ماڭىزدى. دۋەت بويىنشا جۇمىس – قاجىرلى ەڭبەك. دۋەت ساحناسىنىڭ ەموتسيالارىن دۇرىس جەتكىزۋ ءۇشىن ءوز پارتياڭدى ناقتى ءبىلىپ, سەرىكتەستەرىڭدى تىڭداۋىڭ جانە ءوزىڭ ورىندايتىن كەيىپكەر بەينەسىنە ەنىپ, وپەرا سيۋجەتىنىڭ ءبىر بولىگىنە اينالۋىڭ قاجەت, – دەپ كونتسەرت سوڭىنان اكادەميا تىڭداۋشىسى داريعا مۇساەۆا ءوز اسەرىمەن ءبولىستى.

ASTANA OPERA حالىقارالىق وپەرا اكادەمياسىنىڭ تىڭداۋشى­لارى وزدەرىنىڭ العاشقى ەسەپتىك كونتسەرتىندە كورەرمەندەردىڭ زور قوشەمەتىنە بولەندى. «UNO, DUE, TRE…» اتتى باعدارلاماعا ەنگەن الەمدىك وپەرا رەپەرتۋارىنان ­جۇي­ە­لەنگەن ساحنالىق كورىنىستەر مەن دۋەت­تەر وپەرا مۋزىكاسىن باعا­لاۋ­­شى­لاردىڭ كوڭىلىنەن شىقتى دەپ سە­نىممەن ايتا الامىز. وعان كو­رەر­مەننىڭ تولاسسىز سوعىلعان شاپا­لاعى دالەل.