قازاقستان قۇراماسىنىڭ باس باپكەرى تالعات بايسۋفينوۆ ءباسپاسوز ءماسليحاتىن وتكىزدى, دەپ حابارلايدى Egemen.kz قفف-عا سىلتەمە جاساپ.
- قازاقستان قۇراماسىندا نەگىزگى ويىنشىنىڭ ءبىرى باقتيەر زاينۋتدينوۆ جاراقات الىپ قالىپتى. بۇل جاعداي ەرتەڭگى ماتچقا قالاي اسەر ەتەدى.
- بىزدە تەك قانا زاينۋتدينوۆ قانا ەمەس, يان ۆوروگوۆسكي مەن گەورگي جۋكوۆ, سەرگەي مالىي مەن ازات نۇرعاليەۆتەردىڭ دە جاراقاتى بار ەكەنىن ايتايىن. سوسىن, لوگۆينەنكونىڭ دا كىشىگىرىم جاراقاتى بار ەكەن. رامازان ورازوۆتىڭ اياعى قاتتى اۋىرىپ, دارىگەر بۇل فۋتبولشىعا سەنىم ارتپاي-اق قويىڭىز دەپ ايتتى. سوندىقتان دا, ءبىز وسى جەردە جاڭا ويىنشىلاردى تەكسەرىپ الامىز. دەگەنىمەن, ءبىز ىرىكتەۋدىڭ باسىندا كورسەتكەن جاقسى ويىنىمىزدى قايتا كورسەتكىمىز كەلەدى.
- فرانتسيا قۇراماسىنىڭ باس باپكەرى ديدە دەشام كۇنى كەشە عانا قازاقستان قۇراماسىن ماقتادى. باس باپكەرى دە جاقسى مامان ەكەن دەپ ايتتى. ءسىز بۇعان قالاي قارايسىز؟
- ديدە دەشام بىزگە جوعارى باعا بەرگەنىنە ريزامىن. ءبىز فۋتبولدان راحات الىپ ويناعىمىز كەلەدى. قارسىلاسقا ءوزىمىزدىڭ ويىنىمىزدى كورسەتكىمىز كەلەدى. وسىلايشا ءبىز ءتۇبى ءوزىمىزدىڭ مىقتى ويىنىمىزدى تابامىز. ءبىز قازان ايىندا ءوز ويىنىمىزدى جوعالتىپ الدىق. سوندىقتان دا, سول ويىندى قايتارعىمىز كەلەدى. فرانتسيا ءۇشىن بۇل ماتچ وتە ماڭىزدى. ولار الەم چەمپيوناتىنا شىعۋدى ماقسات تۇتادى. بىراق, ءبىز قارسىلاستىڭ اتاق داڭقىنا قاراپ وتىراتىن جاعدايدا ەمەسپىز. جاڭادان الىناتىن جاستارعا جاڭا ويىنشىلارعا بۇل كەرەمەت سەنىمدىلىك بەرەتىن ويىن بولارى انىق.
- نەگىزى جەرەبە تارتۋ راسىمىندە قازاقستاندا بارلىعى ءبىر اۋىزدان اۋتسايدەر دەپ سانادى. الايدا, جارىس بارىسىندا سىزدەر كەرەمەت ويىن كورسەتتىڭىزدەر. سوندا قازاقستان قۇراماسى دامىپ كەلە جاتقان كوماندا دەپ ايتۋعا بولا ما؟
- ءبىزدىڭ كوماندانى ماقتاعانىڭىزعا راحمەت. بۇل ءبىز ءۇشىن قوسىمشا شابىت بەرەرى انىق. الايدا, ءبىز ءۇشىن ماڭىزدىسى ءوزىمىزدىڭ ويىندى كورسەتۋ. قالعانىندا شارۋامىز جوق. ءبىزدىڭ توپ قۇرىلعان كەزدە ماماندار پىكىرىنە قۇلاق استىق. 5 تۋردان كەيىن ءبىزدىڭ ءتىپتى 2 ورىن الۋعا مۇمكىندىگىمىز بولدى. بىراق, قازان ايىندا ەكى ويىندا بار ءۇمىتتى جوعالتىپ الدىق. ءبىز ءۇشىن ءوزىمىزدىڭ جىل باسىندا كورسەتكەن ويىنىمىزدى قايتالاپ كورسەتۋىمىز كەرەك. ءبىز ءۇشىن ەڭ باستىسى ويىن تۇراقتىلىعى.
- فرانتسيامەن وتكەن العاشقى ماتچتان بەرى كومانداڭىزدا نە وزگەردى؟
- ءبىزدىڭ ويىندارىمىزدى كورسەڭىز كوپ وزگەرىس بايقايسىز. ۋكرايناعا قارسى ماتچتاردى ەسكە الايىق. اسىرەسە قورعانىستاعى ويىنىمىز وزگەردى. ءبىز قارسىلاسقا شابۋىلداۋعا كوپ مۇمكىندىكتەر بەرىپ قويدىق. بىراق, شابۋىلعا شىعۋىمىز وتە جيىلەدى. اشىق ويىن كورسەتۋگە تىرىستىق. اراسىندا ويىن مانەرىن وزگەرتىپ, قورعانىسقا سەنىم ارتقان ماتچتارىمىزدا بولدى.