شىمكەنتتە سپورتتىق گيمناستيكادان ەرلەر مەن ايەلدەر اراسىنداعى قازاقستان چەمپيوناتى ءوز مارەسىنە جەتتى. بۇل جارىستا جەرگىلىكتى ورەندەردىڭ مەرەيى ۇستەم بولدى.
بۇرىمدىلاردىڭ باسەكەسىندە كوركەم ەربوسىنقىزىنىڭ ونەرىنە كورەرمەندەر قۇلشىنا قول سوقتى. شىمكەنتتىك ارۋ كەرمە جانە بورەنە جاتتىعۋلارىندا الدىنا جان سالماي, التىننان القا تاقتى. كوپسايىستىڭ قورىتىندىسى بويىنشا دا كوركەمگە تەڭ كەلەر ەشكىم تابىلمادى. كۇمىس جانە قولا مەدالدى الماتىلىق انفيسا يۆانوۆا مەن تالدىقورعاندىق الەكساندرا شامەتكو يەلەندى. سونداي-اق انفيسا قولدى تىرەپ سەكىرۋدە, ال الەكساندرا ەركىن جاتتىعۋدا باس جۇلدەنى ولجالادى.
ەرلەردىڭ كوپسايىسىندا شىمكەنتتىك دياس تويشىبەك توپ جارسا, ونىڭ جەرلەسى الىشەر تايبازاروۆ ەكىنشى ورىندى ەنشىلەدى. ءۇشىنشى ورىندا – نۇر-سۇلتان قالاسىنىڭ وكىلى دميتري پاتانين. جەكەلەگەن جاتتىعۋلاردا مىنا گيمناسشىلار جەڭىمپاز اتاندى: ەركىن جاتتىعۋ – دميتري پاتانين, ات پەن قوسسىرىق – دياس تويشىبەك, شىعىرشىق – اقبار دجالالي, كەرمە مەن قولدى تىرەپ سەكىرۋ – ەميل احمەدجانوۆ.