قازاقستاندا پاندەمياعا بايلانىستى كاسىپورىننىڭ قىزمەتتى توقتاتۋىنا بايلانىستى 3,6 مىڭ ادام ۋاقىتشا جۇمىسسىز ءجۇر. بۇل تۋرالى قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنان ءمالىم ەتتى, دەپ حابارلايدى Egemen.kz.
2021 جىلعى ءۇشىنشى توقساندا قازاقستاندا 8,8 ملن ادام ەڭبەكپەن قامتىلعان. ولاردىڭ اراسىندا 6,7 ميلليونى نەمەسە جۇمىسپەن قامتىلعانداردىڭ جالپى سانىنان 76,1% - جالدامالى قىزمەتتە ىستەيدى.
ەلىمىزدەگى جۇمىسسىزدار سانى – 450,7 مىڭ ادام, جۇمىسسىزدىق دەڭگەيى – 4,9%. ۆەدومستۆو مالىمەتىنە سايكەس, ەلىمىزدە ەڭبەك نارىعى قالپىنا كەلە باستادى. ماسەلەن, بيىلعى ءۇشىنشى توقساندا ەكىنشى توقسانمەن سالىستىرعاندا نەگىزگى جۇمىس ورنىندا جۇمىس كولەمىنىڭ تومەندەۋىنە نەمەسە جۇمىس بەرۋشىنىڭ باستاماسى بويىنشا از ساعاتقا ەڭبەككە تارتىلعاندار سانى 5,3 پايىزعا ازايدى جانە 242,9 مىڭ ادامدى قۇرادى.
قىزمەتتى توقتاتۋ سەبەبىنە بايلانىستى ۋاقىتشا جۇمىس ىستەمەيتىندەر سانى 3,6 مىڭ بولىپ وتىر. ونىڭ ىشىندە 19,7% - كولىك جانە جيناقتاۋ, 15,5% - تۇرۋ جانە تاماقتانۋ بويىنشا قىزمەت كورسەتۋ, 15,3% - ونەر, ويىن-ساۋىق جانە دەمالىس. جۇمىسپەن قامتۋ ورگاندارىندا 2021 جىلعى قازان ايىنىڭ سوڭىنا 193,5 مىڭ ادام جۇمىسسىز رەتىندە رەسمي تىركەلگەن. تىركەلگەن جۇمىسسىزدار ۇلەسى جۇمىس كۇشى سانىنىڭ 2,1% قۇرادى.