قازاقستاندىق عالىمدار جاتىر موينى وبىرىن كەشەندى دياگنوستيكالايتىن ەرىتىندى جاساپ شىعاردى. بۇل – ەكى جىل بويعى زەرتتەۋدىڭ ناتيجەسى. تسيتولوگيا سالاسىندا سۇرانىسقا يە اتالعان سۇيىقتىقتىڭ قۇرامىن س.امانجولوۆ اتىنداعى شىعىس قازاقستان ۋنيۆەرسيتەتىنىڭ زەرتتەۋشىلەرى ساۋىقتىرۋ ورتالىعىنىڭ وكىلدەرىمەن بىرلەسە ازىرلەگەن.
مۇنداي ەرىتىندىنى قازاقستان بۇعان دەيىن شەتەلدەن الدىرىپ كەلگەن. ەندى ونىڭ ورنىن باساتىن وتاندىق ءونىم بار. عالىمداردىڭ وسى جاڭالىعى مەديتسينالىق قىزمەتتىڭ قۇنىن تومەندەتۋگە مۇمكىندىك بەرەدى. ويتكەنى بۇل قارجىلىق جاعىنان دا, گەوگرافيالىق جاعىنان دا قولجەتىمدى بولا تۇسپەك. ءونىمدى ازىرلەۋشىلەردىڭ ايتۋىنشا, ەرىتىندىنىڭ ساپاسى شەتەلدىك انالوگتاردان كەم تۇسپەيدى.
س.امانجولوۆ اتىنداعى شىعىس قازاقستان ۋنيۆەرسيتەتى ۇلتتىق عىلىمي زەرتحاناسىنىڭ كىشى عىلىمي قىزمەتكەرى ايدانا يماشەۆا: «عالىمدارىمىزدىڭ جاساپ شىعارعان تۋىندىسى يمپورتتى الماستىرۋ ماسەلەسىن شەشەدى. وسى زەرتتەۋدىڭ ناتيجەسىندە بيوماتەريالدى ساقتاۋعا ارنالعان بەكىتۋشى ەرىتىندىنىڭ وڭتايلى قۇرامى جاسالدى. بۇل بيوماتەريالداردى تۇراقتاندىرۋعا جانە تاسىمالداۋعا مۇمكىندىك بەرەدى. ياعني ونكولوگيالىق اۋرۋدى ودان ءارى دياگنوستيكالاۋ ءۇشىن جاتىر موينىنا جاقپا رەتىندە پايدالانىلادى. بۇل ازىرلەمەنىڭ بىرەگەيلىگى – قاتەرلى ىسىكتى تەز دياگنوستيكالاۋ ماسەلەلەرىن كەشەندى تۇردە شەشۋ», دەدى.
عالىمدار توبى وزدەرى ازىرلەگەن بەكىتۋشى ەرىتىندىگە پاتەنت العانىن ايتا كەتۋ كەرەك. ءسويتىپ, بۇل ءونىم قازاقستان رەسپۋبليكاسىنىڭ دارىلىك زاتتار مەن مەديتسينالىق بۇيىمدار تىزىلىمىنە ەنگىزىلدى. قازىرگى تاڭدا جوبا كوممەرتسيالاندىرۋ ساتىسىندا. سونىمەن قاتار عالىمدار باسقا دا بيولوگيالىق ماتەريالداردى ساقتاۋ ەرىتىندىسىنىڭ قۇرامىن جاقسارتۋ بارىسىندا جۇمىس ىستەۋدە.