دەنساۋلىق ساقتاۋ مينيسترلىگىندە سەنات جانە ءماجىلىس دەپۋتاتتارىنىڭ قاتىسۋىمەن مينيسترلىك جانىنداعى پاتسيەنتتەردىڭ قۇقىقتارىن قورعاۋ جونىندەگى قوعامدىق كەڭەستىڭ كەزەكتى وتىرىسى ءوتىپ, وندا ناۋقاستاردى دارىمەن قامتاماسىز ەتۋ جايى تىڭدالدى.
«سك-فارماتسيا» جشس باسقارما ءتورايىمى شولپان احمەت كەلتىرگەن مالىمەتتەرگە قاراعاندا, تەڭگە باعامىنىڭ وزگەرۋى ستاتسيونارلاردا جانە ەمحانالاردا ناۋقاستاردى دارىمەن قامتاماسىز ەتۋ كولەمىنە اسەر ەتپەيدى. بىرەگەي وپەراتور 2014 جىلعا ارنالعان ءدارى-دارمەكتى وتكەن جىلى ساتىپ الىپ قويعان. قازىرگى ۋاقىتتا وڭىرلەرگە دارىلەر كەستەگە ساي ۋاقىتىندا جەتكىزىلۋدە.
بىرەگەي وپەراتور جىل سايىن ءدارى ءوندىرۋشى زاۋىتتاردان دەلدالدارسىز تىكەلەي ساتىپ الۋ كولەمىن ۇلعايتقان. 2011 جىلى باستالعان بۇل جۇمىس ءوز جەمىسىن بەرىپ, جالپى كولەمى 18,5 ملرد. تەڭگەگە تىكەلەي كەلىسىمشارتتار جاساۋعا ءمۇمكىندىك بەرگەن. ناتيجەسىندە 3,6 ملرد. تەڭگە ۇنەمدەلىپتى. سونداي-اق, وتاندىق تاۋار وندىرۋشىلەردى قولداۋ جالعاسىپ, 2014 جىلى ولاردىڭ ۇلەسى «سك-فارماتسيا» جشس جالپى ساتىپ الۋ كولەمىنىڭ 75%-ىن قۇراپ, 15,7 ملرد. تەڭگەگە جەتكەن. بۇل ءۇردىس جالعاسىن تاۋىپ, جاڭا ەرەجە ينۆەستيتسيالار تارتۋعا مۇمكىندىك بەرە باستاعان. قازىرگى ۋاقىتتا بىرقاتار وندىرۋشىلەر ەل نارىعىنا قىزىعۋشىلىق تانىتىپ, جاڭا زاۋىتتار سالۋ, قازىرگى بار تەحنولوگيالاردى جاڭارتۋ جانە جاڭالارىن جەتكىزۋگە نيەت بىلدىرۋدە.
بىرەگەي ديستريبيۋتوردىڭ جەكە بيۋدجەتى ەسەبىنەن قالىپتاسقان دارىلىك قۇرالداردىڭ ستراتەگيالىق قورىنىڭ بولۋى ساتىپ الىناتىن دارىلەرگە باعانىڭ كوتەرىلمەۋىنە كەپىلدىك بولادى. وعان بىرقاتار الەۋمەتتىك اۋرۋلاردى ەمدەۋگە ارنالعان دارىلەر كىرەدى.
ساتىپ الۋ ءۇردىسى ورتالىقسىزداندىرىلعان قازىرگى كەزدە 5 ملن. تەڭگەگە دەيىنگى قۇرال-جابدىقتاردى اۋرۋحانالاردىڭ وزدەرىنىڭ ساتىپ الۋىنا, 5 ملن.-نان 50 ملن. تەڭگەگە دەيىنگى تەحنيكالاردى ليزينگ جۇيەسىمەن قول جەتكىزۋگە مۇمكىندىك بەرەدى. بۇگىنگى تاڭدا ليزينگتىك قىزمەتتەردىڭ باسەكەلەستىك نارىعىندا مەديتسينالىق تەحنيكانى ساتىپ الۋدا ەشقانداي شەكتەۋلەر جوق. «قازمەدتەح» اق قىزمەتىنىڭ ءناتيجەسىندە 20 ملرد. تەڭگە ۇنەمدەلىپتى. بۇل دەنساۋلىق ساقتاۋ بيۋدجەتى ءۇشىن اۋقىمدى قارجى ەكەنى باسقوسۋدا ايتىلدى.
دارىلىك قۇرالدارمەن جانە مەديتسينالىق قوندىرعىلارمەن قامتاماسىز ەتۋدىڭ جاڭا جۇيەسى ينۆەستيتسيالار تارتۋعا, وتاندىق وندىرۋشىلەردى قورعاۋدى قامتاماسىز ەتىپ, جاڭا ءوندىرىستىڭ دامۋىنا ىقپال ەتەدى. وسىنىڭ بارلىعى «قازاقستان - 2050» دامۋ ستراتەگياسىنا ساي كەلەدى جانە ەلباسىنىڭ قازاقستان حالقىنا ارناعان تاپسىرمالارى شەڭبەرىندە ىسكە اسىرىلادى.
بەرىك سادىر,
«ەگەمەن قازاقستان».