بىرىككەن ۇلتتار ۇيىمىنىڭ باس حاتشىسى انتونيۋ گۋتەرريش بەلارۋس پەن ەۋروپالىق وداق شەكاراسىندا بولىپ جاتقان ميگرانتتارعا بايلانىستى وقيعانى ساياسي ماقساتتا پايدالانباۋعا شاقىردى, دەپ حابارلايدى Egemen.kz.
بۇل تۋرالى ونىڭ وكىلى ستەفان دۋجارريك مالىمدەدى. ونىڭ ايتۋىنشا, بۇۇ ءبىراز ۋاقىتتان بەرى بەلارۋس-پولشا شەكاراسىنداعى بوسقىندارعا قاتىستى جاعدايدى باقىلاپ وتىر.
«بىرقاتار نەگىزگى قاعيدالار بار: حالىق ەشقاشان ساياسي ماقساتقا جەتۋدىڭ قۇرالى رەتىندە پايدالانىلماۋى كەرەك, اسىرەسە, باسپانا نە قاۋىپسىزدىك ىزدەپ جۇرسە دە, قيىن جاعدايدا تۇرسا دا», دەلىنگەن حابارلامادا.
ەسكە سالايىق, بەلارۋسسيا مەن پولشا, ليتۆا جانە لاتۆيا شەكارالارىنداعى كوشى-قون داعدارىسى سوڭعى بىرنەشە اپتادا كۇرت شيەلەنىستى. بۇۇ بوسقىندار ىستەرى جونىندەگى جوعارعى كوميسسارى باسقارماسىنىڭ (UNHCR) شاقىرۋىنا قاراماستان, پولشا اسكەري قىزمەتشىلەرى تاياۋ شىعىس پەن اۋعانستاننان پولشاعا كورشى بەلارۋستەن كىرەتىن زاڭسىز ميگرانتتارمەن كۇرەسۋ ءۇشىن قورشاۋ ورناتۋعا شەشىم شىعارعان.بۇعان دەيىن پولشا پرەمەر-ءمينيسترى شەكاراداعى ميگرانتتارمەن جاعدايدى سوعىستىڭ «جاڭا ءتۇرى» دەپ اتاعان بولاتىن. سونداي-اق, كۋزنيتساداعى وتكىزۋ پۋنكتى جابىلعاننان كەيىن پولشا-بەلارۋس شەكاراسىندا جۇك كولىكتەرىنىڭ ۇلكەن كەزەگى پايدا بولدى. بۇل تۋرالى پولشا شەكارا كۇزەتى پودلياسك كومەنداتۋراسىنىڭ ءباسپاسوز حاتشىسى كاتاجينا زدانوۆيچ مالىمدەگەن ەدى.