حالىق ماسەلەلەرىن شەشۋ ءۇشىن ۇەۇ الەۋەتىن پايدالانۋ ماڭىزدى — ا.بالاەۆا

وتىرىستىڭ كۇن ءتارتىبى حالىقتى الەۋمەتتىك قورعاۋدىڭ, ەكولوگيالىق پروبلەمالاردىڭ وزەكتى ماسەلەلەرىن شەشۋدەگى ءوزارا ءىس-قيمىلدى ارتتىرۋعا ارنالعان.

وتىرىس بارىسىندا ۇيلەستىرۋ كەڭەسىنە قاتىسۋشىلار حالىقتىڭ وزەكتى ماسەلەلەرىن شەشۋدىڭ ءتيىمدى تاسىلدەرىن ازىرلەۋ, مەملەكەتتىك ورگانداردىڭ باسىم مىندەتتەردى ىسكە اسىرۋدا ۇەۇ الەۋەتىن ءتيىستى تۇردە تارتۋ, الەۋمەتتىك باستامالاردى جۇزەگە اسىرۋدا ازاماتتىق قوعام ۇيىمدارىنىڭ ءرولىن كۇشەيتۋ جانە باسقا دا ماسەلەلەردى قوزعادى.

وتىرىس فورماتى «مەملەكەتتىك ورگان – ۇەۇ» قاعيداتى بويىنشا, ياعني, مەملەكەتتىك ورگانداردىڭ بايانداماسى دا, ۇەۇ وكىلدەرىنىڭ باياندامالارى دا تىڭدالدى.

مينيستر ءوز سوزىندە حالىققا ماڭىزدى ماسەلەلەردى شەشۋ بويىنشا كەشەندى جۇمىستى ۇيىمداستىرۋ ءۇشىن وڭىرلەردەگى ۇەۇ الەۋەتىن پايدالانۋدىڭ وزەكتىلىگىن اتاپ ءوتتى. ا.بالاەۆا ۇەۇ تيىمدىلىگىن ارتتىرۋ ءۇشىن اقپاراتتىق جۇمىستىڭ ماڭىزدىلىعىنا ەرەكشە نازار اۋداردى.

قازاقستاننىڭ ازاماتتىق اليانسىنىڭ پرەزيدەنتى بانۋ نۇرعازيەۆا بايانداما جاساپ: ء«بىز وسى جىلدىڭ مامىر ايىندا وتكەن ۇيلەستىرۋ كەڭەسى وتىرىسىنىڭ ۇسىنىمدارى اقپارات جانە قوعامدىق دامۋ مينيسترلىگى تاراپىنان, باسقا دا مەملەكەتتىك ورگاندار, سونىڭ ىشىندە بىرقاتار وڭىرلەر تاراپىنان دا نازاردان تىس قالماعانىن كورىپ وتىرمىز. ولار بەلسەندى تۇردە قولدانىلادى. الايدا, شەشىلمەگەن ماسەلەلەر دە بار. وسى ورايدا وزەكتى پروبلەمالاردى ايتۋ جانە ولاردى شەشۋ جولدارىن ىزدەستىرۋ ءۇشىن ءدال وسى ۇيلەستىرۋ كەڭەسى ءتيىمدى الاڭ بولىپ قالا بەرۋى ءتيىس. وسى ماسەلەلەردىڭ بارلىعىن الداعى ح ازاماتتىق فورۋمدا كوتەرۋ ماڭىزدى, وعان كوپتەگەن مەملەكەتتىك ورگانداردىڭ ءبىرىنشى باسشىلارى مەن ۇەۇ كوشباسشىلارى قاتىساتىن بولادى», دەدى.

سونداي-اق, نەگىزگى سپيكەرلەر رەتىندە «شىراق» مۇگەدەكتىگى بار ايەلدەر قاۋىمداستىعىنىڭ باسشىسى ل.قالتاەۆا, پاۆلودار وبلىسىنىڭ ازاماتتىق اليانسىنىڭ توراعاسى س.موگيليۋك, سونداي-اق مەملەكەتتىك ورگانداردىڭ وكىلدەرى ءسوز سويلەدى.

قوعام قايراتكەرى ايگۇل سولوۆەۆا اتقارىلىپ جاتقان جۇمىستار تۋرالى ءوز پىكىرىن ءبىلدىردى: «مەنىڭ بايقاعانىم, بۇرىن حالىقارالىق ۇيىمدار قازاقستاندىق ۇەۇ-مەن تىكەلەي جۇمىس ىستەۋدى ءجون كورەتىن. قازىر اقپارات جانە قوعامدىق دامۋ مينيسترلىگىنىڭ ءوزى ولارمەن ماڭىزدى قوعامدىق ماسەلەلەر بويىنشا ىنتىماقتاستىققا اشىق ەكەنىن اتاپ ءوتۋ قاجەت. بۇل ۇكىمەتتىك ەمەس ۇيىمدارمەن ءوزارا ءىس-قيمىل سالاسىندا جۇرگىزىلىپ جاتقان جۇمىسقا دەگەن سەنىمدى ارتتىرا تۇسەدى».

كەزدەسۋ قورىتىندىسى بويىنشا كەڭەس قاتىسۋشىلارى وبلىستاردىڭ, نۇر-سۇلتان, الماتى جانە شىمكەنت قالالارى اكىمدەرىنىڭ ورىنباسارلارىنا وڭىرلىك ماسەلەلەردى شەشۋدە ۇەۇ وكىلدىگىن كەڭەيتۋ جونىندە ءتيىستى ۇسىنىمدار بەردى.

ءوز كەزەگىندە, مەملەكەتتىك ورگاندار ۇكىمەتتىك ەمەس سەكتور تاراپىنان ەسكەرتۋلەر مەن پروبلەمالىق ماسەلەلەردى نازارعا الدى.