9 قاراشادا وزبەكستان پرەزيدەنتىنىڭ توراعالىعىمەن جۇرەك-قان تامىرلارى اۋرۋلارىنىڭ الدىن الۋ جانە ەمدەۋ جۇيەسىن جەتىلدىرۋ ماسەلەلەرى بويىنشا بەينەكونفەرەنتسيا ءوتتى, دەپ حابارلايدى Egemen.kz.
جيىن بارىسىندا مينيسترلەر كابينەتى مەن دەنساۋلىق ساقتاۋ مينيسترلىگىنىڭ اتالعان سالالارداعى قىزمەتىندەگى كەمشىلىكتەر سىنعا الىندى.
«حالقىمىزدىڭ دەنساۋلىعى – ءبىزدىڭ بايلىعىمىز, ونىڭ قۇنىن ەشتەڭەمەن ولشەۋگە بولمايدى. سوندىقتان مەديتسينانى حالىق تالابىنا ساي جۇيەگە اينالدىرۋ جونىندە الدىمىزعا اۋقىمدى مىندەتتەر قويدىق. وسى ماقساتتا ءبىز العاشقى مەديتسينالىق-سانيتارلىق كومەككە بولىنەتىن قاراجاتتى ەكى ەسەگە ارتتىرىپ, ءجيى كەزدەسەتىن اۋرۋلاردىڭ الدىن الۋ بويىنشا جەكە باعدارلاما قابىلدايمىز», دەدى وزبەكستان پرەزيدەنتى.
سونداي-اق كارديولوگيا سالاسىنداعى الداعى مىندەتتەر قاراستىرىلدى. تالداۋ ناتيجەسىنە سۇيەنسەك, وزبەكستاننىڭ 30-70 جاس ارالىعىنداعى تۇرعىنداردىڭ ءولىمىنىڭ 53 پايىزى جۇرەك-قان تامىرلارى اۋرۋلارىمەن بايلانىستى. سوڭعى بەس جىلدا ولاردىڭ سانى 20 پايىزعا ءوستى, ءتىپتى جاستار اراسىندا دا. جۇرەك-قان تامىرلارى اۋرۋلارىنىڭ دياگنوزى ەلدەگى شامامەن 4 ميلليون ادامعا قويىلعان. بۇل جالپى حالىقتىڭ 12 پايىزىن قۇرايدى.
سوندىقتان جۇرەك-قان تامىرلارى اۋرۋلارىنىڭ الدىن الۋ, ەرتە انىقتاۋ جانە ءتيىمدى ەمدەۋدىڭ جاڭا جۇيەسىن ەنگىزۋ جوسپارلانۋدا. ماسەلەن, كەلەر جىلدان باستاپ وتباسىلىق ەمحانالار مەن مەديتسينالىق بريگادالار ارقىلى 40 جاستان اسقان بۇكىل حالىق جىلىنا كەمىندە ءبىر رەت ماقساتتى سكرينينگتەن وتەدى, اۋداندىق زەرتحانالار كواگۋلومەترلەرمەن جانە قاجەتتى رەاگەنتتەرمەن قامتاماسىز ەتىلەدى. جۇرەك-قان تامىرلارى اۋرۋلارىنا شالدىققان ناۋقاستاردىڭ بىرىڭعاي ەلەكتروندى ءتىزىلىمىن ەنگىزۋ, ءدارى-دارمەكتى مۇقتاج جاندارعا تەگىن تاراتۋ جوسپارلانۋدا.