15-19 قاراشا ارالىعىندا نۇر-سۇلتان قالاسىندا مانەرلەپ سىرعاناۋدان «Nur-Sultan Open» اشىق چەمپيوناتى وتەدى, دەپ حابارلايدى Egemen.kz نۇر-سۇلتان قالاسى اكىمدىگىنىڭ رەسمي سايتىنا سىلتەمە جاساپ.
«الاۋ» مۇز سارايىندا وتەتىن جارىستارعا بالالار مەن جاسوسپىرىمدەر, سونداي-اق سپورت شەبەرى مەن سپورت شەبەرىنە ۇمىتكەرلەر قاتىسادى. جەكە رازريادتاعى جارىستار حالىقارالىق كونكيشىلەر وداعىنىڭ تالاپتارىنا سايكەس ۇيىمداستىرىلادى. جارىسقا ەلوردالىق مانەرلەپ سىرعاناۋشىلار دا, ەلىمىزدىڭ باسقا وڭىرلەرىنەن كەلگەن جاس سپورتشىلار دا قاتىسادى.
بۇگىنگى كۇنى قالانىڭ اشىق چەمپيوناتىنا قاتىسۋعا 300-گە جۋىق ءوتىنىم قابىلداندى. ءتۋرنيردىڭ ەرەكشەلىگى — جاس كونكيمەن جۇگىرۋشىلەردىڭ ونەرىن العاش رەت جارىسقا ارنايى شاقىرىلعان حالىقارالىق تورەشىلەر باعالايدى.
كورەرمەندەر مەن جانكۇيەرلەر Ashyq جۇيەسى ارقىلى كىرەدى. سونداي-اق, چەمپيونات YouTube ارقىلى تىكەلەي ەفيردە كورسەتىلەدى.