وسىدان ءدال 20 جىل بۇرىن, ياعني 2001 جىلدىڭ 11 قاراشاسىندا بۋەنوس-ايرەستەگى «بومبونەرا» ستاديونىندا اتاقتى ارگەنتينالىق فۋتبولشى ديەگو مارادونا قوشتاسۋ ماتچىن وتكىزدى.
اتى اڭىزعا اينالعان اياقدوپ شەبەرى 41 جاسىندا ۇلكەن سپورتپەن قوش ايتىستى. 1976-1997 جىلدار ارالىعىندا الەمدەگى ەڭ اتاقتى كوماندالاردىڭ ساپىندا ونەر كورسەتكەن مارادونا يتاليانىڭ «ناپولي» كلۋبىندا جاسىنداي جارقىلداپ, ورتاڭقول كوماندانى ەۋروپا گراندتارىنىڭ بىرىنە اينالدىردى. ۇزاق ۋاقىت بويى ارگەنتينا قۇراماسىن دا ورگە سۇيرەپ, الەم چەمپيونى جانە سول جارىستىڭ كۇمىس جۇلدەگەرى اتانۋىنا ولشەۋسىز ۇلەس قوستى. 1986 جىلى مەكسيكادا وتكەن دۇنيەجۇزىلىك دوپ دوداسىنىڭ قورىتىندىسى بويىنشا ەڭ ۇزدىك فۋتبولشىعا تيەسىلى ارنايى سىيلىقتى يەلەندى. ديەگونىڭ ودان دا باسقا تولىپ جاتقان اتاقتارى جەتەرلىك. ونىڭ بارلىعىن تىزبەكتەپ شىعۋدىڭ ءوزى وڭاي شارۋا ەمەس.
ديەگو مارادونانىڭ قوشتاسۋ ماتچىن كورۋ ءۇشىن «بومبونەراعا» سول كۇنى 50 مىڭنان اسا كورەرمەن جينالدى. ستاديونعا سىيماي قالعاندارى قانشاما. ال تەلەديدار ارقىلى تاماشالاعان جانكۇيەرلەردىڭ سانى ميلليونداپ سانالادى. كىل جۇلدىزداردىڭ باسىن قوسقان باسەكەدە ارگەنتينا فۋتبولشىلارى الەم قۇراماسىن 6:3 ەسەبىمەن ۇتتى.