وتكەن اپتانىڭ اياعىندا فۋتبولدان قازاقستان كۋبوگى جولىنداعى جارىستىڭ جارتىلاي فينالدىق ويىندارى باستالدى. العاشقى ەكى باسەكە نۇر-سۇلتاندا ءوتتى.
«استانا» مەن «قايرات» اراسىنداعى كەزدەسۋدى تاماشالاۋعا كەلگەن جانكۇيەرلەردىڭ ءبىرىنشى تايمدا ىشتەرى ابدەن پىسقانى انىق. ويتكەنى جارتى ساعاتتان اسا ەكى كوماندا تەك اڭداسۋمەن ۋاقىت وتكىزدى. ەشقايسىسى ويىن تىزگىنىن قولعا الۋعا اسىققان جوق. تەك الاڭ يەلەرىنىڭ قورعاۋشىسى انتونيو رۋكاۆينانىڭ تەپكەن دوبى ماڭدايشاعا تيگەننەن كەيىن بارىپ قانا باسەكە قىزا ءتۇستى. ءبىرىنشى تايمعا تورەشى بەس مينۋت قوسقانىمەن, ويىن ودان دا ۇزاققا سوزىلدى. سول ساتتە رادە دۋگاليچ ەسەپ اشىپ ۇلگەردى. ۇزىلىستەن كەيىن قوناقتار تاعى ەكى گول سوقتى. 67-مينۋتتا حوسە كانتە, 72-مينۋتتا ارتۋر شۋشەنچاەۆ نىسانانى ءدال كوزدەدى. ءسويتىپ, بۇل ماتچ 3:0 ەسەبىمەن «قايراتتىڭ» جەڭىسىمەن اياقتالدى.
«شاحتەر» مەن «توبىل» اراسىنداعى باسەكەدە دە ءىرى ەسەپ تىركەلدى – 5:2. قاراعاندىلىقتار ساپىنان يدريس ۋماەۆ ءدۋبلدىڭ اۆتورى اتانسا, داۆيد اتاناسكوسكي, دەۆيد ماۆۋتور جانە ايدوس تاتتىباەۆ ءبىر رەتتەن مەرگەندىك تانىتتى. قوستانايلىقتار اراسىنان اسحات تاعىبەرگەن مەن يگور سەرگەەۆ گول سوقتى.