وزبەكستاندا «جاڭا وزبەكستان – حالىقتىق-گۋمانيتارلىق مەملەكەت» يدەياسىن جۇزەگە اسىرۋعا ەرەكشە كوڭىل بولىنەتىن بولادى. بۇل تۋرالى وزبەكستان پرەزيدەنتىن ۇلىقتاۋ راسىمىندە ءسوز سويلەگەن ەل پرەزيدەنتى شاۆكات ميرزيوەۆ مالىمدەدى, دەپ حابارلايدى Egemen.kz.
– وسى ماقساتتا جەرگىلىكتى ءوزىن-ءوزى باسقارۋ ورگاندارىنىڭ جەرگىلىكتى ماسەلەلەردى شەشۋدەگى ءرولى مەن جاۋاپكەرشىلىگىن ارتتىرامىز. بولاشاقتا مەملەكەت فۋنكتسيالارىنىڭ باسىم بولىگى ورتالىقتان ايماقتارعا بەرىلەدى, – دەدى ميرزيوەۆ.
ونىڭ ايتۋىنشا, قوعامدى باسقارۋدىڭ دىڭگەگى بولىپ تابىلاتىن جانە رەفورمالاردىڭ ناتيجەلەرىن كورسەتەتىن ەلدى مەكەندەر جۇيەسى (ازاماتتاردىڭ ءوزىن-ءوزى باسقارۋ ورگانى) مەن اكىمدىكتەردى ءوزارا بايلانىستىرۋ ماقساتىندا اكىمنىڭ كومەكشىسى (اكىم, باسقارما باسشىسى) قىزمەتى بەكىتىلەتىن بولادى.
– ولار جاڭا جۇمىس ورىندارىن اشۋعا جانە كەدەيلىكتى ازايتۋعا جاۋاپتى بولادى. شاھار توراعاسىنىڭ مىندەتىنە رۋحاني-اعارتۋ جۇمىستارىن جۇرگىزۋ, وتباسىلار مەن ەلدى مەكەندەردە سالاۋاتتى اتموسفەرانى قالىپتاستىرۋ كىرەدى, – دەدى ميرزيوەۆ.
ول ەلدى مەكەندەردە جاستار ءىسى جونىندەگى اگەنتتىكتىڭ وكىلدەرى دە جۇمىس ىستەيتىنىن, ولار جاستار ماسەلەسىمەن تۇراقتى تۇردە اينالىساتىنىن ايتتى.
– سونىمەن قاتار, اكىمدىكتەر مەن ەلدى مەكەندەردىڭ قارجىلىق مۇمكىندىكتەرىن كەڭەيتۋ ماقساتىندا اۋدان بيۋدجەتىنە قوسىمشا كوزدەردەن قاراجات ءتۇسىپ, ءار ەلدى مەكەنگە جەكە قاراجاتتار جاساقتالاتىن بولادى, – دەدى وزبەكستان پرەزيدەنتى.