دارەجان ومىرباەۆ توكيودا «ۇزدىك رەجيسسەر» جۇلدەسىن جەڭىپ الدى

«فەستيۆالدىڭ قازىلار القاسى وسى جۇلدەنى دارەجان ومىرباەۆقا بەردى, ويتكەنى بىزگە فيلمدەگى رەجيسسەردىڭ تەك وزىنە ءتان قولتاڭباسى ەرەكشە ۇنادى», دەدى قازىلار القاسىنىڭ مۇشەسى كريس فۋدجيۆارا (Chris Fujiwara). – بۇل فيلم پوەزيا تۋرالى عانا ەمەس, سونداي-اق وسى ونەردى باعالامايتىن زاماندا اقىن بولۋدىڭ قانشالىقتى قيىن ەكەنىن كورسەتەتىن تۋىندى. بۇگىنگى كۇنى بۇل پروبلەما تاۋەلسىز كينوگەرلەردىڭ الدىندا تۇر دەسەم, ارتىق ايتقانىم ەمەس. بۇل فيلم – ادامزاتتىڭ رۋحاني دامۋىنا تەڭدەسسىز ۇلەس قوساتىن ونەرگە نەمقۇرايدى قارامايتىن ادامداردىڭ ەڭبەگى, دەدى كينوسىنشى.

قازاقستاندىق رەجيسسەر ءوز سوزىندە «اقىن» ءفيلمىن جوعارى باعالاعان قازىلار القاسى مەن فەستيۆال كورەرمەندەرىنە العىسىن ءبىلدىرىپ, كوركەم تۋىندىنىڭ ناقتى باعاسىن ۋاقىت بەرەتىنىن اتاپ ءوتتى.

«بۇل مەنىڭ عانا ەمەس, بۇكىل ءتۇسىرىلىم توبىنىڭ, سونداي-اق «قازاقفيلم» كينوستۋدياسىنىڭ جەڭىسى. وسىنداي جۇلدەلەر توقتاماي جۇمىس ىستەۋگە جىگەر بەرەدى, كوپ راحمەت», دەدى دارەجان ومىرباەۆ.

ەستەرىڭىزگە سالا كەتسەك, قر مادەنيەت جانە سپورت مينيسترلىگى تاپسىرىسى بويىنشا «ۇلتتىق كينونى قولداۋ مەملەكەتتىك ورتالىعى» قولداۋىمەن ش.ايمانوۆ اتىنداعى «قازاقفيلم» اق تۇسىرگەن «اقىن» ءفيلمى ديدار ەسىمدى مويىندالماعان جازۋشىنىڭ ءومىرى تۋرالى. ءفيلمنىڭ ستسەناريى نەمىس جازۋشىسى گەرمان گەسسەنىڭ «اۆتورلىق كەش» جەلىسى بويىنشى جازىلعان. فيلمدەگى باستى ءرولدى «جىگىتتەر» توبىنىڭ ءانشىسى ەردوس قاناەۆ سومدادى. كينوتۋىندىنىڭ تۇسىرىلىمدەرى الماتى قالاسىندا ءوتتى. كارتينانىڭ قويۋشى وپەراتورى – بوريس تروشەۆ, قويۋشى سۋرەتشىسى – الەكساندر روروكين. ءفيلمنىڭ پروديۋسەرلەرى – يۋليا كيم جانە ەرجان احمەتوۆ.

1980 جىلدان بەرى وتكىزىلىپ كەلە جاتقان Tokyo International Film Festival كينوفەستيۆالى حالىقارالىق كينوپروديۋسەرلەر قاۋىمداستىعى فەدەراتسياسىنىڭ (FIAPF ) تىركەۋىنەن وتكەن, «ا» ساناتىنداعى الەمدەگى ۇزدىك 15 كينوبايقاۋدىڭ قاتارىنا كىرەتىن بەدەلدى فەستيۆالدەردىڭ ءبىرى.