سەررا-لەونە استاناسى فريتاۋن قالاسىندا جانارماي قۇيىلعان تانكەر جۇك كولىگىمەن سوقتىعىستى. جارىلىس سالدارىنان جۇزدەن اسا ادام قازا تاپتى.
جارىلىستان بۇرىن جانارماي توگىلىپ, جولدىڭ جان-جاعىنا جايىلعان. سونىڭ سالدارىنان اپاتقا جاقىن ماڭداعى ادامدار مەن كولىكتەر تۇگەلدەي وتقا ورانعان. جەرگىلىكتى بۇقارالىق اقپارات قۇرالدارى تانكەردىڭ جانىندا قاتتى كۇيىپ كەتكەن مۇردەلەردىڭ بەينەسىن كورسەتتى.
وقيعا ورنىنا بارعاننان كەيىن ۆيتسە-پرەزيدەنت موحامەد دجۋلدە دجاللوح بۇل «ۇلتتىق اپات» دەپ مالىمدەدى. ول زارداپ شەككەندەر تەگىن ەمدەلەتىنىن ايتتى. فريتاۋن توڭىرەگىندەگى اۋرۋحانالار مەن دەنساۋلىق ورتالىقتارىنا شامامەن 90-نان استام ادام جەتكىزىلگەن. ولار قازىر ەم قابىلداپ جاتىر. ناۋقاستاردىڭ كەيبىرىنىڭ جاعدايى وتە اۋىر.
جارىلىس جۇما كۇنى قالانىڭ شىعىسىنداعى حالىق تىعىز ورنالاسقان ۆەللينگتون ماڭىنداعى Choithram سۋپەرماركەتىنىڭ سىرتىنداعى جول ايرىعىندا بولعان كورىنەدى.
سەررا-لەونە ۇلتتىق اپاتتاردى باسقارۋ اگەنتتىگى (NDMA) تانكەر ماڭايداعى جانارماي قۇيۋ ستانساسىنا كىرگەن كەزدە كولىكپەن سوقتىعىسقانىن حابارلادى. اگەنتتىكتىڭ حابارلاۋىنشا, جۇرگىزۋشىلەر جانارمايدىڭ توگىلىپ جاتقانىن بايقاپ, وقيعا ورنىنان الىسقا كەتۋدى ەسكەرتكەن. بىراق ادامدار وعان ءمان بەرمەي, تانكەردەن اققان جانارمايدى قۇيىپ الماققا ۇمتىلادى. سول ساتتە كولىك جارىلىپ كەتكەن.