قازاق كسر-ءنىڭ ەكس-ءبىلىم ءمينيسترى, ءبىلىم بەرۋ سالاسىنىڭ ارداگەرى قاجاحمەت بالاحمەتوۆ ومىردەن ءوتتى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى, دەپ حابارلايدى Egemen.kz.
«بۇگىن وتاندىق ءبىلىم بەرۋ ءىسىنىڭ كوريفەيى, قازاق كسر ءبىلىم بەرۋ ءمينيسترى بولعان قاجاحمەت بالاحمەتوۆ ومىردەن وتكەندىگى تۋرالى سۋىت حابار جەتىپ, كوڭىلدى قۇلازىتتى. قاجاحمەت بالاحمەت ۇلى ەلىمىزدىڭ ءبىلىم بەرۋ سالاسىن دامىتۋعا باعا جەتپەس ۇلەس قوسقان ادام. بۇل سالانى 13 جىلدان استام باسقارعان ول, بالالار مەن جاستاردى وقىتۋ ماسەلەسىنە ەرەكشە نازار اۋداراتىن. سوڭعى رەت قاجاحمەت بالاحمەتوۆپەن بيىل جازدا 95 جاس مەرەيتويىمەن قۇتتىقتاپ بارعانىمدا كەزدەسىپ ەدىك. ول ۇنەمى ءبىلىم بەرۋ ىسىندەگى جاڭالىقتاردى قاداعالاپ, ءوز تاجىريبەسىمەن ءبولىسىپ وتىراتىن. قاجاحمەت بالاحمەت ۇلىنىڭ تۋعان-تۋىستارى مەن جاقىندارىنا قايعىلارىنا ورتاقتاسىپ, كوڭىل ايتامىن», دەپ جازدى ا.ايماعامبەتوۆ Facebook پاراقشاسىندا.
قاجاحمەت بالاحمەتوۆ 1926 جىلى 26 ماۋسىمدا قازىرگى اقمولا وبلىسىندا دۇنيەگە كەلگەن.
1948 جىلى قازمۋ-دى (قازىرگى ءال-فارابي اتىنداعى قازاق ۇلتتىق ۋنيۆەرسيتەتىن) بىتىرگەن.
1948 — 1952 جىلدارى – سىرىمبەت ورتا مەكتەبىنىڭ مۇعالىمى. 1953 — 1957 جىلدارى – ەڭبەكشىلدەر اۋدانى ماكينسك جانە ستەپنياك ورتا مەكتەپتەرىنىڭ ديرەكتورى.
1957 — 1960 جىلدارى – كوكشەتاۋ وبلىسى حالىققا ءبىلىم بەرۋ ءبولىمى مەڭگەرۋشىسىنىڭ ورىنباسارى,
1968 — 1980 جىلدارى – مەڭگەرۋشىسى.
1970 — 1974 جىلدارى – قازاقستان كومپارتياسى وك-ءنىڭ عىلىم جانە ءبىلىم بەرۋ مەكەمەلەرى ءبولىمى مەڭگەرۋشىسىنىڭ ورىنباسارى.
1974 — 1987 جىلدارى – قازاق كسر وقۋ-اعارتۋ ءمينيسترى قىزمەتتەرىن اتقارعان. ءبىلىم بەرۋ ماسەلەلەرىنە ارنالعان 70-تەن اسا ەڭبەگى جارىق كوردى. ءۇش مارتە ەڭبەك قىزىل تۋ وردەنىمەن جانە مەدالدارمەن, توسبەلگىلەرمەن جانە گراموتالارمەن ماراپاتتالعان.