قازاقستان رەسپۋبليكاسى تاۋەلسىزدىگىنىڭ 30 جىلدىعى قارساڭىندا ۇلتتىق قاۋىپسىزدىك كوميتەتى «مەملەكەتتىك شەكارا» اتتى تۋىندىنى وقىرمان نازارىنا ۇسىندى, دەپ حابارلايدى Egemen.kz.
كىتاپ ءوزىنىڭ قالتقىسىز قىزمەتى ارقىلى مەملەكەتتىك شەكارانى كۇزەتۋ ىسىنە ولشەۋسىز ۇلەس قوسقان جاۋىنگەرلەرگە ارنالادى. «مەملەكەتتىك شەكاراداعى» اڭگىمەلەردە, وچەركتەر مەن ماقالالاردا تاۋەلسىز قازاقستاننىڭ شەكارا قىزمەتىنىڭ داڭقتى شەجىرەسىندەگى ايتۋلى وقيعالار قامتىلعان. شەكارانىڭ تىنىشتىعىن كۇزەتكەندەردىڭ تىنىمسىز تىرشىلىگى, ءاربىر قازاقستاندىق ءۇشىن قاسيەتتى سانالاتىن ەل شەبىن كۇزەتۋ كەزىندەگى باستارىنان كەشكەن شيەلەنىسكە تولى وقيعالارىمەن ەرەكشەلەنەدى. كىتاپتى قولىنا العان وقىرمان ءوزىن كەيىپكەرلەرمەن بىرگە ەل شەبىندە جۇرگەندەي, بىردە جاياۋ, بىردە اتپەن, تاعى بىردە يتپەن بىرگە قارۋىن ۇستاپ, تاۋ اسىپ, سۋ كەشىپ, تەڭىز تولقىندارىنا قارسى جۇزگەندەي اسەرگە بولەنەدى.
شەكارادان وتكىزۋگە قاتاڭ تىيىم سالىنعان ەسىرتكى تاسىمالداۋشىنى قۇرىقتاپ, تاۋدىڭ ىشىندە مال باعىپ بۇيىعى تىرشىلىك كەشىپ جاتقان شوپاننىڭ وتباسىن كەپىلگە العان قىلمىسكەردەن تايسالماعان شەكاراشىنى سۋ دا, ءورت تە العان بەتىنە قايتارا المايتىنىن «مەملەكەتتىك شەكاراداعى» وقيعالار ارقىلى كوز جەتكىزۋگە بولادى.
تۋىندىنى وقىعان ارداگەر شەكاراشى وزىمەن بىرگە قىزمەت اتقارعان قارۋلاسىمەن قاۋىشادى, ال جيناقتاعى وقيعالار كىشى بۋىن شەكاراشىنى جاڭا ەرلىككە ۇندەيدى.
بۇل كىتاپ – قوعام دامۋىنا ۇلەس قوساتىن قۇندى ەڭبەك. اسىرەسە, وسكەلەڭ ۇرپاققا تاۋەلسىز ەلىمىزدىڭ تىنىشتىعى شەكارادان باستالاتىنىن ساناسىنا ۇيالاتاتىن تاماشا تۋىندى. ويتكەنى, شەكارا – تاۋەلسىزدىگىمىزدىڭ تىرەگى.
«مەملەكەتتىك شەكارا» - شەكاراشىلار ءۇشىن عانا ەمەس, اسكەري ومىردەن تىسقارى قاراپايىم ادامدار ءۇشىن دە وقىلىمدى, قالىڭ وقىرمانعا ارنالعان.