سوڭعى ءۇش جىلدا بايلانىس وپەراتورلارىنىڭ قىزمەت ساپاسىنا قاتىستى 578 تەكسەرۋ جۇرگىزىلىپ, 133,9 ملن تەڭگە ايىپپۇل سالىندى, دەپ حابارلايدى Egemen.kz.
سونىڭ ىشىندە 2019 جىلى 51 تەكسەرىس جۇرگىزىلىپ, 10,9 ملن تەڭگەگە, 2020 جىلى 93 تەكسەرىس جۇرگىزىلىپ, 23,9 ملن تەڭگەگە, بيىل 10 ايدا 434 تەكسەرىس جۇرگىزىلىپ, 99,1 ملن تەڭگەگە ايىپپۇل سالىنعان.
سونىمەن قاتار, ساپاسىز قىزمەت كورسەتكەن وپەراتورلارعا سالىناتىن ايىپپۇل كولەمى 10 ەسەگە ۇلعايتىلىپتى.
«مينيسترلىك ەلدەگى بايلانىس ساپاسىن كوتەرۋ ءۇشىن قارقىندى جۇمىس جۇرگىزىپ جاتقانىن ايتقىم كەلەدى. سونىڭ ىشىندە شالعاي اۋىلدار دا بار. 250+ جوباسى اياسىندا (250-دەن استام تۇرعىنى بار اۋىل ءۇشىن) 900-دەن استام اۋىلعا ينتەرنەت وتكىزدىك. قازىر -250 جوباسى قارالىپ جاتىر. بازالىق ستانسالاردىڭ قۋاتىن ۇلعايتىپ, تەحنولوگيالاردى جاڭارتىپ جاتىرمىز. ەلدى مەكەندەردەگى ينتەرنەت ساپاسىنىڭ تومەنگى شەگىن بەلگىلەدىك, 4G ءۇشىن 5مب/س, 3G - 1 مب/س جوعارى بولۋى ءتيىس. الايدا پروبلەمالار دا بارشىلىق, بۇل جايلى مينيستر ءوزى دە اشىق ايتىپ ءجۇر, سول ماسەلەلەردى شەشۋگە كۇش سالىپ جاتىرمىز. ءبىزدىڭ ەلىمىز ۇلكەن جانە ءار ايماقتىڭ ءوز ەرەكشەلىگى بار: دالالى, تاۋلى, ورماندى, ءشولدى جەرلەر. ءار اۋىلعا ينتەرنەت جەلىسىن جەتكىزۋ وڭاي شارۋا ەمەس, ءتىپتى كەيبىر اۋىلداردا جولدار مەن تۇراقتى ەلەكتر قۋاتى دا جوق», دەيدى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ ءباسپاسوز قىزمەتكەرى ماقسات تولەگەنوۆ.