تاياۋدا ءۇندىستاننىڭ استاناسى نيۋ-دەلي قالاسىندا 1-ءشى ازيا-افريكالىق بيزنەس-فورۋمى بولىپ ءوتتى. ونى ءۇندىستاننىڭ ساۋدا-ونەركاسىپ پالاتاسىنىڭ فەدەراتسياسى وسى ەلدىڭ اۋىل شارۋاشىلىعى جانە تاماق ونەركاسىبى مينيسترلىكتەرىنىڭ قولداۋىمەن ۇيىمداستىردى.
بيزنەس-فورۋم جۇمىسىنا ازيا مەن افريكا وڭىرلەرىنىڭ سالالىق مينيسترلىكتەرىنىڭ, اگروونەركاسىپ كومپانيالارى مەن ينستيتۋتتارىنىڭ باسشىلىعى قاتىستى. شارانىڭ سالتاناتتى اشىلۋ راسىمىندە ءۇندىستاننىڭ پرەزيدەنتى پراناب كۋمار مۋكەردجي قۇتتىقتاۋ ءسوز سويلەدى.
قازاقستاننىڭ ۇندىستانداعى ەلشىلىگى ءوڭىردىڭ ەلدىك ستەندتەرى اراسىنا قازاقستاننىڭ اگرارلىق سالاسىنا قاتىستى ماتەريالداردى ۇسىندى. فورۋمعا قاتىسۋشىلار قازاقستان رەسپۋبليكاسىنداعى وسىمدىك شارۋاشىلىعىن, مال شارۋاشىلىعىن جانە اۋىل شارۋاشىلىعى ونىمدەرىن ءوڭدەۋدى دامىتۋدىڭ نەگىزگى باسىمدىقتارىمەن, قازاقستاننىڭ ۇكىمەتى قابىلداعان جاڭا «اگروبيزنەس-2020» سالالىق باعدارلاماسىمەن, قازاقستاننىڭ اۋىل شارۋاشىلىعى سەكتورى قىزمەتىندە ينۆەستيتسيالار ءۇشىن وڭتايلى جاعدايلار بار ەكەنى تۋرالى ماتەريالدارمەن تانىستىرىلدى.
قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ ەل حالقىنا ارناعان جولداۋىندا جاريالانعان اگروونەركاسىپ كەشەنىن دامىتۋدىڭ نەگىزگى باعىتتارى قاتىسۋشىلار تاراپىنان ۇلكەن قىزىعۋشىلىق تۋعىزدى. ساراپشىلار قازاقستاننىڭ اۋىل شارۋاشىلىعى سالاسىنا ۇلكەن نازار اۋدارىپ وتىرعانىن اتاپ كورسەتتى. ءويتكەنى, بۇل سالا ەلدەگى ءداستۇرلى سالالاردىڭ ءبىرى بولىپ تابىلادى. وسى ورايدا, ءتيىمدى جەر رىنوگىن قۇرۋعا ۇتىمدى ۇمتىلىس تانىتىلىپ وتىر. سونىمەن قاتار, قازاقستاننىڭ اگرارلىق سەكتوردىڭ شاعىن جانە ورتا بيزنەس پىشىنىندە جاڭا وڭدەۋشى كاسىپورىندار جەلىسىن قۇرۋعا ۇمتىلىسى وڭىنان اتالىپ ءوتتى.
«ەگەمەن-اقپارات».