پوليتسەيلەر قىراعىلىق تانىتتى. اتىراۋلىق پوليتسەيلەر ءجاسوسپىرىمدى قاعىپ, وقيعا ورنىنان ءىز سۋىتقان جۇرگىزۋشىنى انىقتادى, دەپ حابارلايدى Egemen.kz.
«29 قازان كۇنى ساعات 21:30 شاماسىندا اتىراۋ قالالىق پوليتسيا باسقارماسىنىڭ «102» وپەراتورىنا قالا تۇرعىنى قوڭىراۋ شالعان. ول ساتىبالديەۆ كوشەسىندەگى «وركەن» شاعىن اۋدانىندا «BMW» ماركالى اۆتوكولىك جول جيەگىندە ءجاسوسپىرىمدى قاعىپ, وقيعا ورنىنان قاشىپ كەتكەنىن حابارلاعان. اتالعان فاكتى بويىنشا جەدەل باسقارۋ ورتالىعىنىڭ پاترۋلدىك پوليتسياسى جانە بەينەباقىلاۋ قىزمەتكەرلەرى جەدەل-ىزدەستىرۋ جۇمىستارىن جۇرگىزىپ, 16 جاستاعى ءجاسوسپىرىمدى قاعىپ كەتكەن جۇرگىزۋشى ايەلدى انىقتادى. 33 جاستاعى ازاماتشا ءوزىنىڭ كىناسىن مويىنداپ, وقيعا ورنىنان قورقىنىشتان جاسىرىنعانىن ايتتى», دەلىنگەن وبلىستىق پوليتسيا باسقارماسىنىڭ ءباسپاسوز قىزمەتىنىڭ حابارلاماسىندا.
پوليتسەيلەر قر قك 345-بابى بويىنشا قىلمىستىق ءىس تىركەلگەنىن, تەرگەۋ جۇرگىزىلىپ جاتقانىن حابارلادى.