قازاقستاندىق بانكتەردىڭ بانكروتقا ۇشىرايتىندىعى تۋرالى جالعان اقپارات تاراتقان بىرنەشە ادام انىقتالدى. بۇل تۋرالى «قازاقستان» تەلەارناسى حابارلادى.
بۇگىن, باس پروكۋراتۋرانىڭ رەسمي وكىلى نۇرداۋلەت سۇيىندىكوۆ وسىنداي مالىمدەمە جاسادى.«بانكتەردىڭ قارجىلىق احۋالى جونىندەگى اقپاراتتارعا قاتىسى بار بارلىق تۇلعالاردى انىقتاۋ بويىنشا كەشەندى ىزدەستىرۋ شارالارى جۇرگىزىلۋدە. بىرقاتار تۇلعالار انىقتالدى جانە ولارعا قاتىستى تەكسەرۋ شارالارى باستالدى», - دەدى ول ءسوز ورايىندا. جالپى, باس پروكۋراتۋرانىڭ مالىمدەمەسىنە جۇگىنسەك, سوڭعى كۇندەرى ءارتۇرلى كوممۋنيكاتسيا قۇرالدارى ارقىلى (الەۋمەتتىك جەلىلەردى قوسا العاندا ينتەرنەت-حابارلامالار, sms) «Kaspi bank», «بانك تسەنتركرەديت» جانە «اليانس بانك» بانكروت بولۋ مۇمكىندىگى تۋرالى جالعان اقپارات تارالعان.وسى حابارلامالار اتالعان بانكتەردىڭ سالىمشىلارىن دۇرلىكتىرىپ, ەلدەگى قارجى ينستيتۋتتارىنا دەگەن تۇرعىنداردىڭ سەنىمىنە سەلكەۋ ءتۇسىردى. ال شىندىعىندا,تاراتىلىپ جاتقان مالىمەتتەر كورىنەۋ جالعان جانە بانك احۋالىن تۇراقسىزداندىرۋعا باعىتتالعان.
قازىرگى ۋاقىتتا قۇقىق قورعاۋ ورگاندارى ءتيىستى ارىزداردىڭ نەگىزىندە بانكتەردىڭ قارجىلىق احۋالى جونىندەگى جالعان اقپاراتقا قاتىسى بار بارلىق تۇلعالاردى انىقتاۋ جونىندەگى جەدەل-ىزدەستىرۋ شارالارىن كەشەندى تۇردە جۇرگىزۋدە. ول بويىنشا قىلمىستىق ءىستى قوزعاۋ ماسەلەسى دە قاراستىرىلۋدا.
دەرەككوز: «قازاقستان» تەلەارناسى.
فوتو: «قازاقستان» تەلەارناسى.