ەلوردادا استانا مەملەكەتتىك قىزمەت حابىنىڭ «مەملەكەتتىك قىزمەتتىڭ دامۋى جانە ىنتىماقتاستىق» اتتى جىلدىق كونفەرەنتسياسى باستالدى, دەپ حابارلايدى Egemen.kz.
كونفەرەنتسياعا استانا مەملەكەتتىك قىزمەت حابى باسقارۋشى كوميتەتىنىڭ توراعاسى اليحان بايمەنوۆ, قر مەملەكەتتىك قىزمەت اگەنتتىگى توراعاسى انار جايلعانوۆا, بۇۇدب-نىڭ قازاقستانداعى تۇراقتى وكىلى ياكۋپ بەريش, ەىدۇ-نىڭ مەملەكەتتىك باسقارۋ ديرەكتوراتىنىڭ باسشىسى ەلزا پيليچوۆسكي, ەۋروپالىق وداقتىڭ قازاقستانداعى وكىلدىگى ىنتىماقتاستىق ءبولىمىنىڭ باسشىسى يوحاننەس ستەينبەك مادسەن, دۇنيەجۇزىلىك بانكت قازاقستانداعى وڭىرلىك مەنەدجەرى جان-فرانسۋا مارتو, قر ءسىم دەپارتامەنت ديرەكتورى ديدار تەمەنوۆ قاتىستى.
حالىقارالىق ءىس-شارانى اشقان استانا مەملەكەتتىك قىزمەت حابى باسقارۋشى كوميتەتىنىڭ توراعاسى ءاليحان بايمەنوۆ ءبىر جارىم جىل ىشىندە ۇكىمەتتەر ءبىرشاما تاجىريبە جيناقتاعانىن, سونىمەن بىرگە كەيبىر تاعىلىمدار تۋرالى دا ايتۋعا بولاتىنىن اتاپ ءوتتى.
«بىرىنشىدەن, داعدارىس جاعدايىندا تەز شەشىم قابىلداۋ قاجەتتىلىگى ۇكىمەتتەردىڭ ەسەپ بەرۋشىلىگى مەن اشىقتىعىنا تەجەۋ بولماۋ كەرەك. ەكىنشىدەن, پاندەميا جەدەلدەتكەن مەملەكەتتىك باسقارۋدى تسيفرلىق ترانسفورماتسيالاۋ ازاماتتاردىڭ قۇقىقتارى مەن بوستاندىقتارىنا نۇقسان كەلتىرمەۋى قاجەت. ۇشىنشىدەن, ينتەرنەت پەن الەۋمەتتىك جەلىلەرگە قولجەتىمدىلىك حالىقارالىق قۇقىقپەن قورعالىپ, ادامنىڭ اجىراعىسىز قۇقىقتارى رەتىندە تانىلۋى ءتيىس. مۇنىڭ ءبارى «جىلدام جەڭىستەر» مەن ستراتەگيالىق ماقساتتار اراسىندا تەڭگەرىمنىڭ بولۋ ماڭىزىن كورسەتەدى», دەدى ول.
استانا مەملەكەتتىك قىزمەت حابى باسقارۋشى كوميتەتىنىڭ توراعاسى وسى تۇرعىدا ۇزدىكسىز ءبىلىم مەن تاجىريبە الماسۋدىڭ ماڭىزى ارتىپ كەلە جاتقانىنا باسا نازار اۋدارتتى.
«بيىلعى كونفەرەنتسيانىڭ تاقىرىبى وسى كەزەڭدە ءبىز سەزىنىپ وتىرعان بايلانىستار مەن كوممۋنيكاتسيالاردى نىعايتۋعا, مەملەكەتتىك باسقارۋ جۇيەسىن ودان ءارى ترانسفورماتسيالاۋ ماقساتىندا جاڭا يدەيالار, تاسىلدەر مەن شەشىمدەر تۋدىراتىن نەعۇرلىم تىعىز ءوزارا ءىس-قيمىلعا دەگەن قاجەتتىلىكتى بارىنشا جاقسى كورسەتەدى», دەدى قر مەملەكەتتىك قىزمەت اگەنتتىگى توراعاسى انار جايلعانوۆا.
كونفەرەنتسيا اياسىندا استانا حابى جۇزەگە اسىرىلاتىن بىرقاتار جاڭا جوبالار تانىستىرىلى ءوتتى:
كورەيا رەسپۋبليكاسى ىشكى ىستەر جانە قاۋىپسىزدىك مينيسترلىگى جانە ۇلتتىق اقپاراتتىق قوعام اگەنتتىگىمەن بىرلەسىپ جۇزەگە اسىرىلىپ جاتقان «مەملەكەتتىك باسقارۋداعى جانە مەملەكەتتىك قىزمەتتەردى كورسەتۋدى تسيفرلاندىرۋداعى يننوۆاتسيالار ءۇشىن الەۋەتتى نىعايتۋ» وڭىرلىك جوباسى; «زەردە» ۇلتتىق ينفوكوممۋنيكاتسيا حولدينگى» اق-مەن بىرلەسىپ ىسكە اسىرىلىپ جاتقان مەملەكەتتىك باسقارۋداعى يننوۆاتسيالاردى اكسەلەراتسيالاۋ زەرتحاناسى; مەملەكەتتىك سەكتورداعى وتەماقى جۇيەلەرىنە سالىستىرمالى شولۋ ناتيجەلەرى; «پوستكەڭەستىك ون بەس ەلدەگى مەملەكەتتىك باسقارۋ ەۆوليۋتسياسى: ترانسفورماتسيا الۋاندىعى» اتتى جاڭا كىتاپ بويىنشا بريفينگ.حابتىڭ 80-نەن استام ينستيتۋتسيونالدىق ارىپتەستەرى بار, سوندىقتان 28 جانە 29 قازانداعى كونفەرەنتسيا حابتىڭ ارىپتەستەرمەن بىرلەسكەن پانەلدىك سەسسيالارمەن جالعاسادى.
ايتا كەتسەك, كونفەرەنتسيا جۇمىسىنا الەمنىڭ 40-تان استام ەلىنەن مەملەكەتتىك قىزمەت ۋاكىلەتتى ورگاندارى باسشىلارى, ساراپشىلار, عالىمدار, سونداي-اق حالىقارالىق ۇيىمدار وكىلدەرى قاتىسىپ جاتىر.
ءىس-شارا 27-29 قازان ارالىعىندا نۇر-سۇلتان قالاسىندا وففلاين جانە ونلاين فورماتىندا وتەدى.