اقمولا وبلىسىندا ءجاسوسپىرىمدى پىشاقپەن قورقىتقان 60 جاستاعى كۇدىكتى ۇستالدى, دەپ حابارلايدى Egemen.kz.
وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە, بيىلعى جىلعى قازاننىڭ 19-دا ەرەيمەنتاۋ اۋداندىق پب كەزەكشىلىك بولىمىنە 52 جاستاعى جەرگىلىكتى تۇرعىنىنان ارىز تۇسكەن. ەر ادامنىڭ سوزىنشە, ونىڭ 16 جاستاعى ۇلىن ەر ادام پىشاقپەن قورقىتقان.
«جەدەل-ىزدەستىرۋ ءىس-شارالارى بارىسىندا بۇرىن قىلمىستىق كودەكستىڭ 99-شى بابىنىڭ 1-بولىگى, 293-ءشى بابىنىڭ 3-بولىگى بويىنشا قىلمىستىق جاۋاپقا تارتىلعان جەرگىلىكتى تۇرعىن, 60 جاستاعى ەر ادام انىقتالدى. تەكسەرۋ كەزىندە كۇدىكتىدەن پىشاق تاركىلەندى», دەدى ۆەدومستۆودان.
قازىرگى كەزدە وسى وقيعاعا بايلانىستى قىلمىستىق كودەكستىڭ 293-ءشى بابىنىڭ 3-بولىگى «بۇزاقىلىق» بويىنشا سوتقا دەيىنگى تەرگەۋ امالدارى قولعا الىندى. كۇدىكتىنى قاماۋعا الۋ تۇرىندەگى بۇلتارتپاۋ شاراسى تاڭدالدى.